ប្រធានាធិបតីអាមេរិក លោក ដូណាល់ ត្រាំ បានបោះឆ្នោតមុនកាលកំណត់នៅរដ្ឋផ្លរីដា កាលពីថ្ងៃសៅរ៍ ទី២៤ ខែតុលា ឆ្នាំ២០២៦ ដើម្បីត្រៀមសម្រាប់ការបោះឆ្នោតពាក់កណ្តាលអាណត្តិ ដែលនឹងប្រព្រឹត្តទៅនៅថ្ងៃទី៣ ខែវិច្ឆិកា។ លោកបានបញ្ជាក់ថា លោកបានបោះឆ្នោតគាំទ្របេក្ខជនគណបក្សសាធារណរដ្ឋទាំងអស់ មុនពេលធ្វើដំណើរទៅចូលរួមយុទ្ធនាការឃោសនានៅរដ្ឋចចជៀ។
សារព័ត៌មានAnadolu Agency។
លោក ត្រាំ និងភរិយា គឺលោកស្រី មេឡានីយ៉ា ត្រាំ បានបោះឆ្នោតនៅការិយាល័យគ្រប់គ្រងការបោះឆ្នោតប្រចាំតំបន់ Palm Beach ក្នុងរដ្ឋផ្លរីដា។ នៅពេលអ្នកសារព័ត៌មានសួរថា តើលោកបានបោះឆ្នោតឱ្យគណបក្សសាធារណរដ្ឋដែរឬទេ លោកបានឆ្លើយថា «ពិតជាមែន»។
លោក ត្រាំ ក៏បានការពារការឃោសនារបស់បេក្ខជនអភិបាលរដ្ឋអូហៃអូ លោក វីវេក រ៉ាម៉ាស្វាមី ដែលរងការរិះគន់ដោយសារប្រើប្រាស់ម្តាយរបស់គូប្រជែងមកពីគណបក្សប្រជាធិបតេយ្យក្នុងវីដេអូឃោសនា។ លោកក៏បានការពារផែនការប្តឹងតវ៉ាលទ្ធផលបោះឆ្នោតជ្រើសរើសសមាជិកព្រឹទ្ធសភានៅរដ្ឋអាឡាស្កា ប្រសិនបើបេក្ខជនគណបក្សសាធារណរដ្ឋចាញ់ ដោយរដ្ឋបាលលោកលើកឡើងពីភាពស្រដៀងគ្នានៃឈ្មោះបេក្ខជនពីររូប។
ទាក់ទងនឹងសង្គ្រាមជាមួយអ៊ីរ៉ង់ លោក ត្រាំ បាននិយាយថា សហរដ្ឋអាមេរិកអាចនឹងបញ្ចប់សង្គ្រាម ឬអាចឈានដល់កិច្ចព្រមព្រៀងជាមួយអ៊ីរ៉ង់ ប៉ុន្តែលោកជឿជាក់ថា អាមេរិកនឹងទទួលបានជោគជ័យ។
ចំណែកលោកស្រី មេឡានីយ៉ា ត្រាំ បាននិយាយថា លោកស្រីនឹងពិចារណាអំពីលទ្ធភាពធ្វើដំណើរទៅអ៊ុយក្រែន បន្ទាប់ពីបានជួយសម្របសម្រួលបទឈប់បាញ់នៅទីក្រុងអូឡេស្ក៊ី ដើម្បីសម្រួលដល់ការផ្តល់ជំនួយមនុស្សធម៌ និងការជម្លៀសជនស៊ីវិល។
លោក ត្រាំ ក៏បានបង្ហាញការគាំទ្រចំពោះសមាជិកសភាគណបក្សសាធារណរដ្ឋ លោក បៃរ៉ុន ដូណាល់ស៍ ដែលកំពុងប្រកួតប្រជែងតំណែងអភិបាលរដ្ឋផ្លរីដា ជំនួសលោក រ៉ុន ដេសាន់ទីស ដែលមិនអាចឈរឈ្មោះបន្តតាមកំណត់អាណត្តិបាន៕
