រដ្ឋាភិបាលបារាំងត្រូវបានរាយការណ៍ថា បានស្នើឱ្យក្រុមហ៊ុនទូរគមនាគមន៍ត្រៀមផ្អាកការប្រើប្រាស់បណ្ដាញសង្គមមួយចំនួនជាបណ្ដោះអាសន្ន ប្រសិនបើមានអំពើហិង្សាកើតឡើងក្នុងអំឡុងបាតុកម្មចលនាអាវកាក់លឿង កាលពីចុងសប្ដាហ៍នេះ។
សារព័ត៌មានAnadolu Agency នៅថ្ងៃទី២៥ខែតុលា។
យោងតាមសារព័ត៌មានអនឡាញបារាំង Blast នាយករដ្ឋមន្ត្រីបារាំង លោក សេបាស្ទ្យង់ ឡឺកនូ បានផ្ញើលិខិតទៅកាន់តំណាងក្រុមហ៊ុនទូរគមនាគមន៍ Orange, SFR, Free និង Bouygues Telecom កាលពីថ្ងៃព្រហស្បតិ៍ ដោយស្នើឱ្យពួកគេត្រៀមផ្អាកការចូលប្រើបណ្ដាញសង្គមដូចជា TikTok, Instagram, Snapchat និង X ប្រសិនបើមានអំពើហិង្សាកើតឡើង។
របាយការណ៍បានឱ្យដឹងថា រដ្ឋាភិបាលចង់ឱ្យវិធានការរឹតត្បិតនេះអនុវត្តតែលើទូរសព្ទចល័ត និងតំបន់ជាក់លាក់ប៉ុណ្ណោះ។ ប៉ុន្តែ ក្រុមហ៊ុនទូរគមនាគមន៍បានបង្ហាញការព្រួយបារម្ភ និងលើកឡើងថា ពួកគេមិនមានលទ្ធភាពបច្ចេកទេសគ្រប់គ្រាន់ដើម្បីអនុវត្តវិធានការនេះក្នុងរយៈពេលខ្លីនោះទេ។
គិតត្រឹមពេលចេញផ្សាយ រដ្ឋាភិបាលបារាំងមិនទាន់ឆ្លើយតបចំពោះរបាយការណ៍នេះនៅឡើយទេ។
សូមបញ្ជាក់ថា៖ កាលពីឆ្នាំ២០២៤ រដ្ឋាភិបាលបារាំងធ្លាប់បានបិទការចូលប្រើ TikTok ក្នុងអំឡុងបាតុកម្មនៅតំបន់ញូកាឡេដូនី។ ប៉ុន្តែ នៅឆ្នាំ២០២៥ ក្រុមប្រឹក្សារដ្ឋបារាំងបានលុបចោលសេចក្ដីសម្រេចរបស់រដ្ឋាភិបាលដែលដាក់កម្រិតលើការប្រើប្រាស់វេទិកានេះនៅក្នុងតំបន់នោះ។
ចលនាអាវកាក់លឿងបានត្រឡប់មកធ្វើបាតុកម្មតាមដងផ្លូវកាលពីថ្ងៃសៅរ៍ ដើម្បីតវ៉ាប្រឆាំងនឹងការកើនឡើងនៃថ្លៃរស់នៅ។ តាមរបាយការណ៍ មនុស្សប្រមាណ ១.០០០ នាក់ត្រូវបានឃាត់ខ្លួនក្នុងអំឡុងបាតុកម្ម៕
