មេដឹកនាំបក្សប្រឆាំងអ៊ីស្រាអែលពីររូប បានចោទប្រកាន់នាយករដ្ឋមន្ត្រី លោក បេនចាមីន ណេតាន់យ៉ាហ៊ូ ថាកំពុងបង្កការភ័យខ្លាច និងភាពភ័យស្លន់ស្លោក្នុងចំណោមប្រជាជន ដើម្បីទាក់ទាញការគាំទ្រមុនការបោះឆ្នោតសភា នៅថ្ងៃទី២៧ ខែតុលា ឆ្នាំ២០២៦។
សារព័ត៌មានAnadolu Agency។
ភាពចម្រូងចម្រាសនេះកើតឡើង បន្ទាប់ពីលោក ណេតាន់យ៉ាហ៊ូ បានបង្ហោះរូបភាពដែលបង្កើតដោយបញ្ញាសិប្បនិម្មិត (AI) បង្ហាញពីការផ្ទុះគ្រាប់បែកនុយក្លេអ៊ែរនៅទីក្រុងតែលអាវីវ ព្រមទាំងព្រមានអំពីការគំរាមកំហែង ប្រសិនបើអ៊ីរ៉ង់ទទួលបានអាវុធនុយក្លេអ៊ែរ។
លោក ហ្គាឌី អៃសិនខត អតីតមេបញ្ជាការកងទ័ពអ៊ីស្រាអែល និងជាមេដឹកនាំគណបក្ស យ៉ាសារ បានរិះគន់ថា លោក ណេតាន់យ៉ាហ៊ូ កំពុងប្រើវិធីសាស្ត្រដដែលៗក្នុងយុទ្ធនាការបោះឆ្នោត ដោយផ្សព្វផ្សាយព័ត៌មានមិនពិត និងបង្កការភ័យខ្លាចដល់ប្រជាជន។
ចំណែកលោក យ៉ៃអ៊ែរ ហ្គោឡាន មេដឹកនាំគណបក្ស ដេម៉ូក្រាត ក៏បានរិះគន់ការបង្ហោះរូបភាពនេះដែរ ដោយចោទថា លោកនាយករដ្ឋមន្ត្រីកំពុងធ្វើឱ្យប្រជាជនភ័យស្លន់ស្លោ ខណៈការប្រកួតប្រជែងផ្នែកនយោបាយកាន់តែតានតឹង។
លោក ណេតាន់យ៉ាហ៊ូ បានផ្តោតសំខាន់លើយុទ្ធនាការសន្តិសុខជាតិ ជាពិសេសការគំរាមកំហែងពីកម្មវិធីនុយក្លេអ៊ែររបស់អ៊ីរ៉ង់។ ប៉ុន្តែបក្សប្រឆាំងបានចោទថា លោកកំពុងយកបញ្ហានេះមកប្រើប្រាស់ដើម្បីទទួលបានការគាំទ្រផ្នែកនយោបាយ។
ភាពតានតឹងនេះកើតឡើងតែពីរថ្ងៃមុនការបោះឆ្នោតសភាអ៊ីស្រាអែល ដែលគណបក្សរបស់លោក ណេតាន់យ៉ាហ៊ូ ត្រូវប្រកួតប្រជែងជាមួយបក្សប្រឆាំងដែលចង់បញ្ចប់ការដឹកនាំរបស់លោក៕
