ប្រទេសជាច្រើន រួមទាំងសហរដ្ឋអាមេរិក និងមហាអំណាចអឺរ៉ុបសំខាន់ៗ បានលើកឡើងថា ប្រទេសស៊ូដង់ កំពុងជួបប្រទះនឹងការធ្លាក់ចុះយ៉ាងធ្ងន់ធ្ងរគួរឱ្យព្រួយបារម្ភ នៃសន្តិសុខស្បៀង ហើយបានអំពាវនាវដល់ភាគីជម្លោះនៅក្នុងប្រទេសនេះ«ឱ្យដកចេញនូវរាល់ឧបសគ្គទាំងអស់ដែលរារាំងដល់ជំនួយមនុស្សធម៌»។
សារព័ត៌មាន(Reuters)នៅថ្ងៃទី២៧.១០.២០២៦។
បណ្តាប្រទេសទាំងនោះ បានថ្លែងរួមគ្នាថា ដោយសារតែមានហានិភ័យនៃគ្រោះទុរភិក្ស ពួកគេកំពុងអំពាវនាវដល់សហគមន៍អន្តរជាតិឱ្យបង្កើនការផ្តល់មូលនិធិ និងជំរុញឱ្យស្ថាប័នហិរញ្ញវត្ថុនានា កែសម្រួលកម្មវិធីដែលកំពុងដំណើរការរបស់ខ្លួន ឱ្យស្របទៅនឹងស្ថានភាពសន្តិសុខស្បៀងជាក់ស្តែង។
សេចក្តីថ្លែងការណ៍រួមដែលចេញផ្សាយដោយក្រសួងការបរទេសសហរដ្ឋអាមេរិកបានឱ្យថា «ប្រទេសស៊ូដង់ កំពុងជួបប្រទះនឹងការធ្លាក់ចុះយ៉ាងធ្ងន់ធ្ងរគួរឱ្យព្រួយបារម្ភនៃសន្តិសុខស្បៀង។
ហានិភ័យនៃគ្រោះទុរភិក្សក្នុងរយៈពេលប៉ុន្មានខែខាងមុខនេះ ដូចដែលបានព្រមានដោយប្រព័ន្ធចាត់ថ្នាក់ដំណាក់កាលសន្តិសុខស្បៀង (Integrated Food Security Phase Classification – IPC) តម្រូវឱ្យមានសកម្មភាពជាបន្ទាន់»។
«ភាគីជម្លោះនានា គឺជាអ្នកទទួលខុសត្រូវចម្បងក្នុងការកាត់បន្ថយទុក្ខវេទនារបស់ប្រជាជនស៊ូដង់»។
កងទ័ពស៊ូដង់ បាននិងកំពុងប្រយុទ្ធជាមួយកងកម្លាំងពាក់កណ្តាលយោធាឈ្មោះ«កងកម្លាំងគាំទ្ររហ័ស» (Rapid Support Forces – RSF) ចាប់តាំងពីខែមេសា ឆ្នាំ ២០២៣ មកម្ល៉េះ បន្ទាប់ពីភាគីទាំងពីរមានជម្លោះនឹងគ្នាលើបញ្ហាមួយចំនួន រួមទាំងការបញ្ចូលកងកម្លាំងរបស់ពួកគេទៅក្នុងរចនាសម្ព័ន្ធតែមួយ ក្នុងអំឡុងពេលនៃការផ្លាស់ប្តូរទៅរកការគ្រប់គ្រងដោយរដ្ឋបាលស៊ីវិល។
កាលពីខែមិថុនា ប្រព័ន្ធចាត់ថ្នាក់ដំណាក់កាលសន្តិសុខស្បៀង (IPC) ដែលគាំទ្រដោយអង្គការសហប្រជាជាតិ បានរាយការណ៍ថា ប្រជាជនចំនួន ៥,១ លាននាក់នៅក្នុងប្រទេសស៊ូដង់ កំពុងប្រឈមមុខនឹងភាពអត់ឃ្លានយ៉ាងធ្ងន់ធ្ងរ។
កសិករជួបការលំបាកក្នុងការប្រមូលផលដំណាំ ចាប់តាំងពីសង្គ្រាមស៊ីវិលបានផ្ទុះឡើងក្នុងឆ្នាំ ២០២៣ ហើយថ្មីៗនេះ ពួកគេក៏កំពុងប្រឈមមុខនឹងគ្រោះរាំងស្ងួតផងដែរ៕
