កងទ័ពយេម៉ែ នបានប្រកាសកាលពីយប់ថ្ងៃអង្គារ ទី២៧ ខែតុលា ថាខ្លួនបានធ្វើការវាយប្រហារចំនួន១.៣៨២ លើក ប្រឆាំងនឹងក្រុមហ៊ូទី ដោយអះអាងថា ការវាយប្រហារទាំងនេះបានបណ្តាលឱ្យសមាជិកក្រុមហ៊ូទី និងមេបញ្ជាការប្រហែល៤៤០នាក់ស្លាប់ ឬអស់សមត្ថភាពប្រយុទ្ធ។
សារព័ត៌មានAnadolu Agency។
អ្នកនាំពាក្យកងទ័ពយេម៉ែន លោក ម៉ាជេដ អាល់-នូហ្សៃលី បានឱ្យដឹងថា ប្រតិបត្តិការនេះបានកំណត់គោលដៅលើមូលដ្ឋានបញ្ជាការ ទីតាំងការពារ ឃ្លាំងអាវុធ កងកម្លាំង និងយានយន្តយោធារបស់ក្រុមហ៊ូទី។
នៅខេត្តតាអ៊ីស ភាគនិរតីនៃប្រទេស កងទ័ពយេម៉ែន និងក្រុមប្រយុទ្ធតស៊ូក្នុងតំបន់ ដែលទទួលបានការគាំទ្រពីយន្តហោះចម្បាំង បានវាយប្រហាររួមគ្នា ដោយអាចទប់ស្កាត់ការប៉ុនប៉ងរបស់ក្រុមហ៊ូទីក្នុងការដណ្តើមយកទីតាំងដែលបានបាត់បង់មកវិញ។ កងទ័ពក៏អះអាងថា ខ្លួនទទួលបានទីតាំងយុទ្ធសាស្ត្រថ្មីៗផងដែរ។
ការប្រយុទ្ធគ្នានៅខេត្តតាអ៊ីសបានបន្តអស់រយៈពេលជាច្រើនសប្តាហ៍ ដោយមានអ្នកស្លាប់ និងរបួសរាប់រយនាក់នៅភាគីទាំងពីរ។ កងទ័ពយេម៉ែនក៏កំពុងបន្តប្រតិបត្តិការនៅតាមតំបន់ជុំវិញរដ្ឋធានីសាណា ដើម្បីកាត់បន្ថយសមត្ថភាពរបស់ក្រុមហ៊ូទីក្នុងការផ្លាស់ប្តូរកងកម្លាំង និងបញ្ជូនអាវុធទៅកាន់សមរភូមិផ្សេងៗ។
កងទ័ពយេម៉ែនបានបញ្ជាក់ថា ប្រតិបត្តិការយោធានឹងបន្តនៅតាមខ្សែសមរភូមិ ខណៈវិធានការការពារជនស៊ីវិល និងហេដ្ឋារចនាសម្ព័ន្ធស៊ីវិលកំពុងត្រូវបានអនុវត្ត។ រហូតមកដល់ពេលចេញផ្សាយ ក្រុមហ៊ូទីមិនទាន់ឆ្លើយតបនឹងការអះអាងនេះទេ។
ភាពតានតឹងផ្នែកយោធានៅយេម៉ែនបានកើនឡើងចាប់តាំងពីខែកក្កដា ហើយត្រូវបានពិពណ៌នាថា ជាការប្រយុទ្ធខ្លាំងបំផុតចាប់តាំងពីមានបទឈប់បាញ់ក្នុងខែមេសា ឆ្នាំ២០២២។ ជម្លោះនៅប្រទេសនេះបានចាប់ផ្តើមកាន់តែធ្ងន់ធ្ងរ បន្ទាប់ពីក្រុមហ៊ូទីដណ្តើមកាន់កាប់រដ្ឋធានីសាណា និងខេត្តជាច្រើនក្នុងឆ្នាំ២០១៤៕
