ការបោះឆ្នោតសកលនៅអ៊ីស្រាអែល កាលពីថ្ងៃទី២៧ ខែតុលា ឆ្នាំ២០២៦ មិនទាន់បង្ហាញអ្នកឈ្នះច្បាស់លាស់ទេ ខណៈលទ្ធផលស្ទង់មតិក្រោយបិទការបោះឆ្នោតបង្ហាញថា ប្លុកនយោបាយរបស់នាយករដ្ឋមន្ត្រី បេនចាមីន ណេតាន់យ៉ាហ៊ូ និងប្លុកគូប្រជែងដែលដឹកនាំដោយអតីតមេបញ្ជាការកងទ័ព ហ្គាឌី អៃសិនកូត មានសំឡេងប្រហាក់ប្រហែលគ្នា។
សារព័ត៌មានReuter។
តាមលទ្ធផលស្ទង់មតិរបស់ស្ថាប័នផ្សព្វផ្សាយមួយចំនួន ប្លុកទាំងពីរទទួលបានសំឡេងប្រហែល ៥១ ទៅ ៥២ អាសនៈ ខណៈសភាអ៊ីស្រាអែលមាន ១២០ អាសនៈ។ ដើម្បីបង្កើតរដ្ឋាភិបាល ភាគីណាមួយត្រូវការយ៉ាងហោចណាស់ ៦១ អាសនៈ។ លទ្ធផលរាប់សន្លឹកឆ្នោតពិតប្រាកដនៅមិនទាន់បញ្ចប់នៅឡើយទេ។
លោកណេតាន់យ៉ាហ៊ូបានអំពាវនាវឱ្យបង្កើតរដ្ឋាភិបាលជាតិដែលមាននិន្នាការស្តាំនិយមខ្លាំង ខណៈលោកអៃសិនកូតបានអះអាងថា ប្រជាជនមិនចង់ឱ្យលោកណេតាន់យ៉ាហ៊ូបន្តកាន់តំណែងនាយករដ្ឋមន្ត្រីទៀតទេ ហើយបានអំពាវនាវឱ្យលោកចាកចេញពីឆាកនយោបាយ។ ទោះជាយ៉ាងណា ភាគីទាំងពីរមិនបានប្រកាសថាខ្លួនឈ្នះការបោះឆ្នោតឡើយ។
គណបក្សសាសនានិយមជ្រុលស្តាំនិយម ដែលដឹកនាំដោយលោក អ៊ីតាម៉ារ បេន-ហ្គវៀ និងលោក បេហ្សាឡែល ស្មូត្រិច ត្រូវបានព្យាករថានឹងទទួលបានសរុប ១៣ អាសនៈនៅក្នុងប្លុករបស់លោកណេតាន់យ៉ាហ៊ូ។ ចំណែកគណបក្សដែលមានទំនាក់ទំនងជាមួយសហគមន៍អារ៉ាប់ ត្រូវបានព្យាករថានឹងទទួលបានប្រហែល ១៧ ទៅ ១៩ អាសនៈ ដែលអាចមានឥទ្ធិពលលើការបង្កើតរដ្ឋាភិបាល។
ទោះជាយ៉ាងណា លោកណេតាន់យ៉ាហ៊ូ និងលោកអៃសិនកូត សុទ្ធតែបានបដិសេធលទ្ធភាពបង្កើតរដ្ឋាភិបាលជាមួយគណបក្សអារ៉ាប់ ដែលធ្វើឱ្យការប្រមូលសំឡេងភាគច្រើនកាន់តែស្មុគស្មាញ។
ប្រសិនបើប្លុកទាំងពីរមិនអាចប្រមូលសំឡេងបានគ្រប់គ្រាន់ដើម្បីបង្កើតរដ្ឋាភិបាលទេ អ៊ីស្រាអែលអាចត្រូវរៀបចំការបោះឆ្នោតម្តងទៀតក្នុងរយៈពេលប៉ុន្មានខែខាងមុខ។ នេះជាការបោះឆ្នោតសកលលើកដំបូងរបស់ប្រទេស ចាប់តាំងពីការវាយប្រហាររបស់ក្រុមហាម៉ាស់កាលពីថ្ងៃទី៧ ខែតុលា ឆ្នាំ២០២៣៕
