អ្នកជំនាញអង្គការសហប្រជាជាតិ (UN) កាលពីថ្ងៃទី២៨ ខែតុលា បានសម្តែងការព្រួយបារម្ភចំពោះការប្រើកម្លាំងហួសហេតុរបស់អាជ្ញាធរបារាំង ក្នុងការបង្ក្រាបការតវ៉ារបស់និស្សិត និងបានព្រមានថា ការចាប់ខ្លួនមនុស្សរាប់ពាន់នាក់ ដែលភាគច្រើនជាអនីតិជន អាចធ្វើឱ្យពួកគេខ្លាចក្នុងការបញ្ចេញមតិ និងប្រមូលផ្តុំគ្នាតវ៉ាដោយសន្តិវិធី។
សារព័ត៌មានAl Jazeera។
ការតវ៉ានៅប្រទេសបារាំងបានចាប់ផ្តើមតាំងពីពាក់កណ្តាលខែកញ្ញា ដោយសារនិស្សិតមិនពេញចិត្តនឹងស្ថានភាពសាលារៀន ដូចជាអគារចាស់ទ្រុឌទ្រោម ថ្នាក់រៀនមានសិស្សច្រើន និងកង្វះគ្រូបង្រៀន។ ក្រោយមក ការតវ៉ាបានពង្រីកទៅដល់ការប្រឆាំងនឹងការចំណាយលើការរស់នៅដែលកាន់តែខ្ពស់។
អង្គការសហប្រជាជាតិបានបញ្ជាក់ថា ទោះបីរដ្ឋាភិបាលបានព្យាយាមចរចាជាមួយនិស្សិតក៏ដោយ ក៏ការផ្តោតសំខាន់លើការប្រើវិធានការសន្តិសុខបានធ្វើឱ្យបញ្ហាដើមដែលបង្កឱ្យមានការតវ៉ាមិនទទួលបានការយកចិត្តទុកដាក់គ្រប់គ្រាន់។
ក្រសួងមហាផ្ទៃបារាំងបានឱ្យដឹងថា ការតវ៉ាកាលពីថ្ងៃសៅរ៍មានអ្នកចូលរួមប្រមាណ ៤១០.០០០ នាក់នៅទូទាំងប្រទេស ហើយអាជ្ញាធរបានដាក់ពង្រាយកងកម្លាំងសន្តិសុខ ៧០.០០០ នាក់ និងចាប់ខ្លួនមនុស្ស ១.០០០ នាក់។ កាលពីសប្តាហ៍មុន ក៏មានការបំផ្លិចបំផ្លាញអគារសាធារណៈ និងការលួចទ្រព្យសម្បត្តិពីហាងជាច្រើនផងដែរ៕
