នៅថ្ងៃព្រហស្បតិ៍ ទី២៩ ខែតុលា ឆ្នាំ២០២៦ កូរ៉េខាងជើងបានបាញ់មីស៊ីលបាលីស្ទិករយៈចម្ងាយខ្លីប្រហែល១០គ្រាប់ឆ្ពោះទៅសមុទ្រ ខណៈភាពតានតឹងជាមួយកូរ៉េខាងត្បូងកំពុងកើនឡើង។
សារព័ត៌មានAp។
យោធាកូរ៉េខាងត្បូងបានឱ្យដឹងថា មីស៊ីលទាំងនេះត្រូវបានបាញ់ចេញពីទីក្រុងវ៉ុនសាន នៅឆ្នេរភាគខាងកើតនៃកូរ៉េខាងជើង។ ក្រោយហេតុការណ៍នេះ កូរ៉េខាងត្បូងបានបង្កើនការតាមដានសន្តិសុខ និងសហការផ្លាស់ប្តូរព័ត៌មានជាមួយសហរដ្ឋអាមេរិក និងជប៉ុន។
ភាពតានតឹងរវាងប្រទេសទាំងពីរបានកើនឡើង បន្ទាប់ពីការផ្ទុះមីននៅតំបន់ព្រំដែនកាលពីខែកញ្ញា ដែលបណ្តាលឱ្យទាហានកូរ៉េខាងត្បូង ៣ នាក់រងរបួស។ កូរ៉េខាងត្បូងបានចោទប្រកាន់កូរ៉េខាងជើងថា ជាអ្នកដាក់មីន ប៉ុន្តែកូរ៉េខាងជើងបានបដិសេធការចោទប្រកាន់នេះ។
កាលពីសប្តាហ៍មុន កូរ៉េខាងជើងក៏បានប្រកាសថា ខ្លួននឹងចាប់ផ្តើមផ្សាយសារឃោសនាតាមឧបករណ៍បំពងសំឡេងនៅតាមព្រំដែនឡើងវិញ និងដាក់ពង្រាយអាវុធថ្មីៗ។ កូរ៉េខាងត្បូងបានស្នើឱ្យមានកិច្ចចរចាដើម្បីបង្ការការប៉ះទង្គិចដោយចៃដន្យ ប៉ុន្តែកូរ៉េខាងជើងមិនទាន់ឆ្លើយតបនៅឡើយ។
អ្នកជំនាញយល់ថា ការសាកល្បងមីស៊ីលជាបន្តបន្ទាប់របស់កូរ៉េខាងជើង អាចមានគោលបំណងដាក់សម្ពាធលើសហរដ្ឋអាមេរិក ដើម្បីទទួលបានសម្បទានបន្ថែមក្នុងការចរចា។
ទន្ទឹមនឹងនេះ មេដឹកនាំកូរ៉េខាងជើង លោក គីម ជុងអ៊ុន បានធ្វើទស្សនកិច្ចទៅកាន់ទីក្រុងដាន់ទុង ប្រទេសចិន កាលពីថ្ងៃសៅរ៍ ដើម្បីរំឭកដល់ការគាំទ្ររបស់ចិនក្នុងសង្គ្រាមកូរ៉េឆ្នាំ១៩៥០-១៩៥៣ និងជំរុញកិច្ចសហប្រតិបត្តិការរវាងប្រទេសទាំងពីរ៕
