ប្រព័ន្ធផ្សព្វផ្សាយអ៊ីស្រាអែល បានរាយការណ៍កាលពីថ្ងៃព្រហស្បតិ៍ទី២៩.១០.២០២៦ថា សន្លឹកឆ្នោតក្នុងស្រោមពីរជាន់(double-envelope ballots) ជាង២៣៣,០០០សន្លឹក ដែលស្មើនឹងជិត៥០% នៃចំនួនសរុប ត្រូវបានរាប់រួចហើយ នៅក្នុងការបោះឆ្នោតរបស់ប្រទេសអ៊ីស្រាអែល។
សារព័ត៌មានAnadolu។
យោងតាមទូរទស្សន៍ Channel12 បន្ទាប់ពីការរាប់សន្លឹកឆ្នោតធម្មតាទាំងអស់រួចរាល់ ប្លុករបស់នាយករដ្ឋមន្ត្រី Benjamin Netanyahu ត្រូវបានគេរំពឹងថា នឹងទទួលបាន៥៣ អាសនៈ។
ខណៈដែលប្លុកប្រឆាំងដឹកនាំដោយលោក Gadi Eisenkot មេដឹកនាំគណបក្ស Yashar ទទួលបាន៤៨ អាសនៈ ហើយគណបក្សដែលភាគច្រើនជាជនជាតិអារ៉ាប់ទទួលបាន១៩អាសនៈ។
សន្លឹកឆ្នោតក្នុងស្រោមពីរជាន់ចំនួន២៣៣,៨១៥សន្លឹក ត្រូវបានរាប់រួចហើយ ក្នុងចំណោមសន្លឹកឆ្នោតសរុបជិត ៥០០,០០០សន្លឹក។
សន្លឹកឆ្នោតក្នុងស្រោមពីរជាន់ ត្រូវបានប្រើប្រាស់ដោយអ្នកបោះឆ្នោត ដែលបោះឆ្នោតនៅក្រៅការិយាល័យបោះឆ្នោតដែលពួកគេបានចុះឈ្មោះទុក រួមមាន ទាហាន អ្នកការទូត មន្ត្រីប៉ូលិស និងប្រជាពលរដ្ឋដែលត្រូវផ្លាស់ទីលំនៅជាដើម។
មន្ត្រីទទួលបន្ទុកនឹងពិនិត្យមើលព័ត៌មានអត្តសញ្ញាណនៅលើស្រោមសំបុត្រខាងក្រៅ ដើម្បីទប់ស្កាត់ការបោះឆ្នោតជាន់គ្នា បន្ទាប់មកពួកគេនឹងបំបែកស្រោមសំបុត្រនោះចេញពីសន្លឹកឆ្នោតដែលមិនបញ្ជាក់អត្តសញ្ញាណម្ចាស់ឆ្នោត មុនពេលធ្វើការរាប់សន្លឹកឆ្នោតទាំងនោះ។
សន្លឹកឆ្នោតដែលនៅសល់អាចនឹងផ្លាស់ប្តូរចំនួនអាសនៈរបស់គណបក្សនីមួយៗ ក៏ដូចជាតុល្យភាពអំណាចរវាងប្លុកនយោបាយគូប្រជែង។
យោងតាមសេចក្តីរាយការណ៍ គណៈកម្មាធិការបោះឆ្នោតកណ្តាលបានប៉ាន់ប្រមាណថា ការរាប់សន្លឹកឆ្នោតក្នុងស្រោមពីរជាន់ នឹងបញ្ចប់នៅពេលរសៀលនេះ។
គ្មានប្លុកនយោបាយធំៗណាមួយត្រូវបានគេរំពឹងថា នឹងទទួលបានអាសនៈចំនួន៦១ ដែលជាចំនួនចាំបាច់សម្រាប់ការបង្កើតសំឡេងភាគច្រើននៅក្នុងសភា Knesset ដែលមានសមាជិកសរុប ១២០នាក់នោះទេ។
សម្ព័ន្ធគណបក្សអារ៉ាប់ “Joint List” ត្រូវបានគេរំពឹងថានឹងទទួលបាន ១២ អាសនៈ ហើយគណបក្ស “United Arab List” (Ra’am) ទទួលបាន៧ អាសនៈ ដែលធ្វើឱ្យគណបក្សអារ៉ាប់ទាំងនេះទទួលបានអាសនៈសរុបចំនួន ១៩អាសនៈ ដែលជាចំនួនខ្ពស់បំផុតមិនធ្លាប់មាន។
យោងតាមគណៈកម្មាធិការបោះឆ្នោត អត្រាអ្នកចេញទៅបោះឆ្នោតមានចំនួន ៧៧,៧% ដែលជាកម្រិតខ្ពស់បំផុតគិតចាប់តាំងពីឆ្នាំ ១៩៩៩មក៕
