កងឆ្មាំបដិវត្តន៍អ៊ីស្លាមអ៊ីរ៉ង់(IRGC) អះអាងថាខ្លួនបានបាញ់ទម្លាក់ដ្រូនប្រភេទMQ-1 មួយគ្រឿង នៅភាគខាងកើតច្រកសមុទ្រហ័រមូស កាលពីថ្ងៃទី២៩ ខែតុលា ឆ្នាំ២០២៦។
សារព័ត៌មានAnadolu Agency។
តាមទីភ្នាក់ងារសារព័ត៌មាន ISNA របស់អ៊ីរ៉ង់ ដ្រូននេះជាដ្រូន MQ-1 ទី១៤ ដែលប្រព័ន្ធការពារដែនអាកាសរបស់អ៊ីរ៉ង់អះអាងថាបានស្ទាក់ចាប់ និងបំផ្លាញ។ អ៊ីរ៉ង់ក៏បានអះអាងថា ខ្លួនបានប្រើប្រព័ន្ធសង្គ្រាមអេឡិចត្រូនិក បង្ខំឱ្យដ្រូនអាមេរិកមួយគ្រឿងទៀតចុះចតដោយសុវត្ថិភាព។
ជាមួយគ្នានេះ កងទ័ពជើងទឹកអ៊ីរ៉ង់បាននិយាយថា នាវាដឹកប្រេងចំនួន៣គ្រឿងបានបុកមីន និងឆាបឆេះក្នុងរយៈពេល២៤ម៉ោង បន្ទាប់ពីមិនអើពើនឹងការព្រមាន និងព្យាយាមចាកចេញពីច្រកសមុទ្រហ័រមូសតាមផ្លូវដែលអ៊ីរ៉ង់ចាត់ទុកថាមិនមានការអនុញ្ញាត។
ហេតុការណ៍នេះកើតឡើង ខណៈមានការព្រួយបារម្ភថា សហរដ្ឋអាមេរិក និងអ៊ីស្រាអែលអាចបើកការវាយប្រហារថ្មីលើអ៊ីរ៉ង់។ សារព័ត៌មាន Wall Street Journal បានរាយការណ៍ថា អាមេរិកបានប្រាប់ប្រទេសអារ៉ាប់មួយចំនួននៅតំបន់ឈូងសមុទ្រ ឱ្យត្រៀមខ្លួនសម្រាប់ប្រតិបត្តិការយោធាដ៏ខ្លាំងក្លា និងមានរយៈពេលខ្លី បន្ទាប់ពីការបោះឆ្នោតពាក់កណ្តាលអាណត្តិរបស់អាមេរិក នៅថ្ងៃទី៣ ខែវិច្ឆិកា។
គួរបញ្ជាក់ថា សង្គ្រាមរវាងអាមេរិក អ៊ីស្រាអែល និងអ៊ីរ៉ង់បានចាប់ផ្តើមនៅថ្ងៃទី២៨ ខែកុម្ភៈ។ ចាប់តាំងពីពេលនោះមក អ៊ីរ៉ង់បានឆ្លើយតបដោយការវាយប្រហារដោយមីស៊ីល និងដ្រូន ហើយបានធ្វើឱ្យការធ្វើនាវាចរណ៍តាមច្រកសមុទ្រហ័រមូសរងការរាំងស្ទះ។
ច្រកសមុទ្រហ័រមូសជាផ្លូវដឹកជញ្ជូនប្រេង និងថាមពលដ៏សំខាន់របស់ពិភពលោក។ កិច្ចព្រមព្រៀងបឋមដែលបានចុះហត្ថលេខាកាលពីខែមិថុនា ដើម្បីឈានទៅរកសន្តិភាពរវាងភាគីទាំងពីរ ក៏បានបរាជ័យដោយសារការខ្វែងគំនិតគ្នា ជាពិសេសបញ្ហាសេរីភាពក្នុងការធ្វើនាវាចរណ៍តាមច្រកសមុទ្រនេះ៕
