ក្រសួងការពារជាតិរុស្ស៊ីបានអះអាងនៅថ្ងៃទី២៩ ខែតុលា ឆ្នាំ២០២៦ ថាប្រព័ន្ធការពារដែនអាកាសរបស់ខ្លួនបានស្ទាក់ចាប់ និងបំផ្លាញដ្រូនអ៊ុយក្រែនចំនួន ១.២១៤គ្រឿង ដែលបានវាយប្រហារតំបន់ចំនួន២០របស់រុស្ស៊ីក្នុងរយៈពេលមួយយប់។
សារព័ត៌មានAnadolu Agency។
ចំនួននេះលើសកំណត់ត្រាមុនដែលរុស្ស៊ីបានរាយការណ៍កាលពីថ្ងៃទី២០ ខែកញ្ញា នៅពេលដែលខ្លួនអះអាងថា មានដ្រូនចំនួន ១.១១០គ្រឿងបានវាយប្រហារ។
អភិបាលក្រុងម៉ូស្គូ លោក សឺហ្គេ សូប៊ីយ៉ានីន បាននិយាយថា ដ្រូនចំនួន ៦១៣គ្រឿងបានសំដៅទៅកាន់តំបន់ម៉ូស្គូ ហើយក្នុងនោះ ២៣១គ្រឿងត្រូវបានបំផ្លាញនៅពេលកំពុងខិតជិតរដ្ឋធានី។
ការវាយប្រហារនេះបានធ្វើឱ្យអាជ្ញាធរអាកាសចរណ៍រុស្ស៊ីផ្អាកជាបណ្តោះអាសន្ននូវជើងហោះហើរចេញ និងចូលនៅអាកាសយានដ្ឋានចំនួន៣ ក្នុងតំបន់ម៉ូស្គូ ដើម្បីធានាសុវត្ថិភាព។ ក្រោយមក ការរឹតបន្តឹងទាំងនេះត្រូវបានដកចេញវិញ។
សារព័ត៌មាន TASS បានរាយការណ៍ថា យន្តហោះពីរគ្រឿងដែលហោះពីទីក្រុងអ៊ីស្តង់ប៊ុល ប្រទេសតួកគី ឆ្ពោះទៅកាន់ទីក្រុងម៉ូស្គូ ត្រូវបង្វែរទិសដៅត្រឡប់ទៅអ៊ីស្តង់ប៊ុលវិញ ដោយសារការរឹតបន្តឹងនៅអាកាសយានដ្ឋាន។ ការរឹតបន្តឹងក៏ត្រូវបានដាក់នៅអាកាសយានដ្ឋានក្នុងទីក្រុងចំនួន១៨ផ្សេងទៀតរបស់រុស្ស៊ីផងដែរ។
យ៉ាងណាក៏ដោយ អ៊ុយក្រែនមិនទាន់ចេញសេចក្តីថ្លែងការណ៍ឆ្លើយតបចំពោះការអះអាងនេះនៅឡើយទេ ហើយព័ត៌មាននេះមិនអាចផ្ទៀងផ្ទាត់ដោយឯករាជ្យបានទេ ដោយសារសង្គ្រាមនៅតែបន្ត៕
