មនុស្ស ៤នាក់ដែលជាសមាជិកនៃកងកម្លាំងសហភាពអឺរ៉ុបប្រចាំ នៅបូស្នៀ (EUFOR)បានស្លាប់ បន្ទាប់ពីឧទ្ធម្ភាគចក្រយោធារបស់អ៊ីតាលីមួយគ្រឿង ដែលកំពុងធ្វើប្រតិបត្តិការហ្វឹកហ្វឺន បានធ្លាក់ កាលពីថ្ងៃទី២៩.១០.២០២៦!។
សារព័ត៌មានAl Jazeera។
ឧទ្ធម្ភាគចក្រប្រភេទCH-47 Chinook មួយគ្រឿង បានធ្លាក់ក្នុងអំឡុងពេល«ការហ្វឹកហ្វឺនជាប្រចាំ»នៅតំបន់ Brcko កាលពីថ្ងៃព្រហស្បតិ៍ ដែលស្ថិតនៅចម្ងាយប្រហែល១៨០គីឡូម៉ែត្រ(១១០ ម៉ាយ) ភាគខាងជើងនៃរដ្ឋធានី Sarajevo របស់ប្រទេសបូស្នៀ។
EUFOR បញ្ជាក់ថា មនុស្សសរុប១១ នាក់បានរងរបួស នៅក្នុងហេតុការណ៍ធ្លាក់នេះ ដោយបន្ថែមថា អ្នករងរបួសទាំងអស់កំពុងទទួលការព្យាបាល ហើយស្ថានភាពសុខភាពរបស់ពួកគេគឺមានលក្ខណៈនឹងនរ។
រដ្ឋាភិបាលអ៊ីតាលី បានចេញសេចក្តីថ្លែងការណ៍មួយថា អ្នកដែលនៅលើឧទ្ធម្ភាគចក្រយោធានោះទាំងអស់ សុទ្ធតែជាពលរដ្ឋរបស់ខ្លួន។
យោងតាមក្រសួងការពារជាតិអ៊ីតាលី ជនរងគ្រោះ រួមមានទាហាន ២នាក់ និងអ្នកស្ម័គ្រចិត្តកាកបាទក្រហម២ នាក់។
រដ្ឋមន្ត្រីក្រសួងការពារជាតិអ៊ីតាលី លោក Guido Crosetto បានមានប្រសាសន៍ថា៖«នៅក្នុងគ្រាដ៏សោកសៅបំផុតនេះ គំនិតរបស់ខ្ញុំគឺផ្តោតទៅលើក្រុមគ្រួសារនៃអ្នកដែលបានបាត់បង់ជីវិត ដែលខ្ញុំសូមចូលរួមរំលែកទុក្ខយ៉ាងក្រៀមក្រំផ្ទាល់ខ្លួន និងក្នុងនាមស្ថាប័នការពារជាតិទាំងមូល»។
បណ្តាញសារព័ត៌មាននៅបូស្នៀបានចុះផ្សាយរូបភាពនៃបំណែកឧទ្ធម្ភាគចក្រ ដែលបង្ហាញថាវាបានក្រឡាប់នៅលើដីក្នុងវាលទំនាបមួយ។
អ្នកនាំពាក្យមន្ទីរពេទ្យ Brcko បានប្រាប់ទីភ្នាក់ងារសារព័ត៌មាន AFP ថា មានមនុស្ស១៥នាក់នៅលើឧទ្ធម្ភាគចក្រនោះនៅពេលកើតហេតុ ដែលដំបូងឡើយបានបណ្តាលឱ្យមនុស្ស ៣នាក់ស្លាប់។
អ្នកនាំពាក្យរូបនោះបាននិយាយថា៖ «មនុស្ស១២នាក់ត្រូវបានបញ្ជូនមកមន្ទីរពេទ្យរបស់យើង។ ជាអកុសល មនុស្សទី៤ បានស្លាប់ដោយសាររបួសធ្ងន់ធ្ងរនៅពេលមកដល់មន្ទីរពេទ្យ»។
នៅក្នុងសេចក្តីថ្លែងការណ៍មួយ កងកម្លាំង EUFOR បានបញ្ជាក់ថា៖ «EUFOR កំពុងធ្វើការស៊ើបអង្កេតយ៉ាងពេញលេញ និងហ្មត់ចត់លើហេតុការណ៍នេះ ហើយនឹងផ្តល់ព័ត៌មានបន្ថែមនៅពេលដែលព័ត៌មានទាំងនោះត្រូវបានផ្ទៀងផ្ទាត់ និងនៅពេលសមស្រប»៕
