ព្រះរាជទាយាទអារ៉ាប៊ីសាអូឌីត ព្រះអង្គម្ចាស់ ម៉ូហាម៉េដ ប៊ីន សាល់ម៉ាន់ បានពិភាក្សាអំពីទំនាក់ទំនង និងស្ថានការណ៍ក្នុងតំបន់ជាមួយមេដឹកនាំកូរ៉េខាងត្បូង រ៉ូម៉ានី និងអេស្ប៉ាញ តាមរយៈការសន្ទនាតាមទូរស័ព្ទដាច់ដោយឡែកពីគ្នា កាលពីថ្ងៃទី២៩ ខែតុលា ឆ្នាំ២០២៦។
សារព័ត៌មានAnadolu Agency។
ក្នុងការសន្ទនាជាមួយប្រធានាធិបតីកូរ៉េខាងត្បូង លោក លី ជេម្យុង មេដឹកនាំទាំងពីរបានពិភាក្សាអំពីការពង្រឹងកិច្ចសហប្រតិបត្តិការរវាងប្រទេសទាំងពីរ។ ជាមួយគ្នានេះ លោក លី ក៏បានថ្កោលទោសការវាយប្រហាររបស់ក្រុមហ៊ូទីនៅយេម៉ែន លើទីតាំងស៊ីវិលក្នុងប្រទេសអារ៉ាប៊ីសាអូឌីតផងដែរ។
ចំណែកក្នុងការសន្ទនាជាមួយប្រធានាធិបតីរ៉ូម៉ានី លោក នីគូស័រ ដាន និងនាយករដ្ឋមន្ត្រីអេស្ប៉ាញ លោក ផេដ្រូ សាន់ឆេស ភាគីទាំងពីរបានពិភាក្សាអំពីទំនាក់ទំនងទ្វេភាគី និងស្ថានការណ៍ក្នុងតំបន់។ លោក សាន់ឆេស ក៏បានថ្កោលទោសការវាយប្រហាររបស់ក្រុមហ៊ូទី និងបញ្ជាក់ពីការគាំទ្រយ៉ាងពេញទំហឹងរបស់អេស្ប៉ាញចំពោះអារ៉ាប៊ីសាអូឌីត។
ជាការឆ្លើយតប ព្រះរាជទាយាទអារ៉ាប៊ីសាអូឌីតបានចូលរួមរំលែកទុក្ខចំពោះអ្នកស្លាប់ក្នុងហេតុការណ៍រថភ្លើងល្បឿនលឿនបុកគ្នានៅប្រទេសអេស្ប៉ាញ និងជូនពរអ្នករងរបួសឱ្យឆាប់ជាសះស្បើយ។
គួរបញ្ជាក់ថា អារ៉ាប៊ីសាអូឌីតបានដឹកនាំក្រុមចម្រុះយោធា ដើម្បីគាំទ្ររដ្ឋាភិបាលយេម៉ែនប្រឆាំងនឹងក្រុមហ៊ូទី ចាប់តាំងពីខែមីនា ឆ្នាំ២០១៥ ខណៈក្រុមហ៊ូទីបានកាន់កាប់រដ្ឋធានីសាណា និងតំបន់មួយចំនួនរបស់យេម៉ែនតាំងពីឆ្នាំ២០១៤៕
