ប្រធានាធិបតីចិន លោក ស៊ី ជីនពីង (Xi Jinping) បានជំរុញឱ្យប្រទេសចិន និងអឺរ៉ុបពង្រឹងកិច្ចសហប្រតិបត្តិការ ជាពិសេសលើវិស័យសេដ្ឋកិច្ច និងពាណិជ្ជកម្ម ក្នុងជំនួបដាច់ដោយឡែកជាមួយប្រធានាធិបតីអាល្លឺម៉ង់ លោក ហ្វ្រែង-វ៉ាល់ធ័រ ស្តាញម៉ៃយ័រ និងប្រធានាធិបតីស្វីស លោក ហ្គី ផាម៉ឺឡាំង កាលពីថ្ងៃសុក្រ ទី៣០ ខែតុលា ឆ្នាំ២០២៦។
ប្រភពពីសារព័ត៌មានAnadolu Agency។
ក្នុងជំនួបជាមួយប្រធានាធិបតីអាល្លឺម៉ង់ លោក ស៊ី បានអំពាវនាវឱ្យប្រទេសទាំងពីរជ្រើសរើសការបើកចំហ និងកិច្ចសហប្រតិបត្តិការ ជំនួសឱ្យភាពឯកោ និងការប្រឈមមុខដាក់គ្នា។ លោកក៏បានសង្កត់ធ្ងន់លើសារៈសំខាន់នៃការគោរពគ្នាទៅវិញទៅមក និងការដោះស្រាយភាពខុសគ្នាតាមរយៈការសន្ទនា។
ចំណែកក្នុងជំនួបជាមួយប្រធានាធិបតីស្វីស លោក ស៊ី បានជំរុញឱ្យប្រទេសទាំងពីរពង្រឹងទំនាក់ទំនងសេដ្ឋកិច្ច និងពាណិជ្ជកម្ម ដើម្បីបង្កើនទំនុកចិត្ត និងស្ថិរភាពសេដ្ឋកិច្ចពិភពលោក។
ជាមួយគ្នានេះ មេដឹកនាំទាំងពីរបានចូលរួមក្នុងពិធីចុះហត្ថលេខាលើពិធីសារធ្វើឱ្យប្រសើរឡើងនូវកិច្ចព្រមព្រៀងពាណិជ្ជកម្មសេរីរវាងប្រទេសទាំងពីរ ព្រមទាំងឯកសារសហប្រតិបត្តិការមួយចំនួនទៀតលើវិស័យស្រាវជ្រាវវិទ្យាសាស្ត្រ ការងារ និងប្រព័ន្ធផ្សព្វផ្សាយ។
លោក ស៊ី បានបញ្ជាក់ថា ប្រទេសចិនមានឆន្ទៈក្នុងការពង្រឹងកិច្ចសហប្រតិបត្តិការជាមួយអឺរ៉ុប ដើម្បីជំរុញសេដ្ឋកិច្ចពិភពលោកឱ្យកាន់តែបើកចំហ និងផ្តល់ផលប្រយោជន៍ដល់ប្រទេសទាំងអស់៕
