កងកម្លាំងអ៊ីស្រាអែលបានបង្កើនការវាយប្រហារនៅភាគខាងត្បូងប្រទេសលីបង់ កាលពីថ្ងៃសុក្រ ទី៣០ ខែតុលា ឆ្នាំ២០២៦ ដោយបានបំផ្ទុះផ្ទះសម្បែង ដុតផ្ទះ និងបាញ់ផ្លោងកាំភ្លើងធំទៅលើតំបន់ជាច្រើន។
ប្រភពពីសារព័ត៌មានAnadolu Agency។
តាមទីភ្នាក់ងារព័ត៌មានជាតិលីបង់ កងកម្លាំងអ៊ីស្រាអែលបានបាញ់កាំភ្លើងយន្តនៅទីក្រុងឃៀម និងកង់តារ៉ា ព្រមទាំងដុតផ្ទះប្រជាជននៅតំបន់កង់តារ៉ា។ កងទ័ពអ៊ីស្រាអែលក៏បានបំផ្ទុះផ្ទះមួយខ្នងនៅទីក្រុងតៃរី និងបាញ់ផ្លោងកាំភ្លើងធំទៅកាន់តំបន់ជាច្រើនទៀតផងដែរ។
ហេតុការណ៍នេះកើតឡើង ទោះបីប្រទេសលីបង់ និងអ៊ីស្រាអែលធ្លាប់បានឈានដល់កិច្ចព្រមព្រៀងក្របខណ្ឌមួយកាលពីថ្ងៃទី២៦ ខែមិថុនា ដើម្បីឱ្យអ៊ីស្រាអែលដកកងទ័ពចេញពីទឹកដីលីបង់ជាបណ្តើរៗ និងដាក់ពង្រាយកងទ័ពលីបង់ទៅកាន់តំបន់ទាំងនោះក៏ដោយ។
ទោះជាយ៉ាងណា អ៊ីស្រាអែលនៅតែបន្តប្រតិបត្តិការយោធា ខណៈទីក្រុងជាង៥០ នៅតែស្ថិតក្រោមការកាន់កាប់របស់អ៊ីស្រាអែល។
យោងតាមប្រភពព័ត៌មានដដែល ចាប់តាំងពីថ្ងៃទី២ ខែមីនា មក ការវាយប្រហាររបស់អ៊ីស្រាអែលបានបណ្តាលឱ្យមនុស្សយ៉ាងហោចណាស់ ៤.៣៨៦នាក់ស្លាប់ និង ១២.៤០៧នាក់រងរបួស។ ចំណែកប្រជាជនជាង១លាននាក់ត្រូវបានបង្ខំឱ្យចាកចេញពីផ្ទះសម្បែង។
កិច្ចប្រជុំយោធារវាងប្រទេសទាំងពីរ ក្រោមការសម្របសម្រួលរបស់សហរដ្ឋអាមេរិក កាលពីថ្ងៃទី២០ និង២១ ខែតុលា ក៏មិនទាន់ទទួលបានលទ្ធផលរួមណាមួយដែរ ដោយសារភាពខ្វែងគំនិតគ្នាលើការដកកងទ័ពអ៊ីស្រាអែល និងការរំសាយអាវុធរបស់ក្រុមហេសបូឡា៕
