សហរដ្ឋអាមេរិកបានអនុម័តជាគោលការណ៍លើការលក់មីស៊ីលការពារដែនអាកាស Patriot PAC-3 ចំនួន៥០០គ្រាប់ ក្នុងតម្លៃប៉ាន់ស្មាន២,១ពាន់លានដុល្លារឱ្យប្រទេសអ៊ុយក្រែន។
សារព័ត៌មានAl Jazeera នៅថ្ងៃទី៣១ខែតុលា។
ក្រសួងការបរទេសអាមេរិកបានប្រកាសពីកិច្ចព្រមព្រៀងនេះកាលពីថ្ងៃសុក្រ ទី៣០ ខែតុលា ដោយរួមមានមីស៊ីល គ្រឿងបន្លាស់ និងជំនួយបច្ចេកទេស។ ការអនុម័តនេះត្រូវបានចាត់ទុកថា ជាជំហានដ៏សំខាន់មួយក្នុងការផ្គត់ផ្គង់អាវុធការពារដល់អ៊ុយក្រែន ចាប់តាំងពីលោក ដូណាល់ ត្រាំ ចូលកាន់តំណែងជាប្រធានាធិបតីអាមេរិកក្នុងឆ្នាំ២០២៥។
ប្រព័ន្ធមីស៊ីល Patriot គឺជាអាវុធការពារដែនអាកាសដ៏មានប្រសិទ្ធភាពក្នុងការស្ទាក់ចាប់មីស៊ីលបាលីស្ទិកដែលមានល្បឿនលឿន។ អ៊ុយក្រែនបានស្នើសុំមីស៊ីលស្ទាក់ចាប់បន្ថែមជាបន្ទាន់ ដើម្បីទប់ទល់នឹងការវាយប្រហារដោយមីស៊ីលរបស់រុស្ស៊ី ដែលកំពុងកើនឡើង។
ប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡេនស្គី បានឱ្យដឹងថា ប្រទេសរបស់លោកបានរង់ចាំអស់រយៈពេលជិតមួយខែ ដើម្បីឱ្យអាមេរិកអនុម័តការផ្គត់ផ្គង់មីស៊ីលសំខាន់ៗទាំងនេះ។
ទោះជាយ៉ាងណា អ៊ុយក្រែនអាចនឹងមិនទទួលបានមីស៊ីលទាំងនេះក្នុងពេលឆាប់ៗនោះទេ ដោយសារការផលិត និងការប្រគល់អាវុធតាមកិច្ចព្រមព្រៀងលក់ជាធម្មតាត្រូវការរយៈពេលច្រើនឆ្នាំ៕
