លោក Recep Tayyip Erdogan ប្រធានាធិបតីតួគី បានអំពាវនាវឱ្យទាំងរុស្ស៊ី និងអ៊ុយក្រែន បញ្ឈប់ការកំណត់គោលដៅលើនាវាស៊ីវិល នៅក្នុងសមុទ្រខ្មៅ ។
ខណៈដែលលោក និងប្រធានាធិបតីអ៊ុយក្រែន លោក Volodymyr Zelenskyy បានព្រមព្រៀងគ្នាធ្វើការលើច្រករបៀងដឹកជញ្ជូនគ្រាប់ធញ្ញជាតិថ្មីមួយឆ្លងកាត់ដែនទឹកនេះ។
សារព័ត៌មានAl Jazeera ។
លោក Erdogan បានលើកឡើងបែបនេះកាលពីថ្ងៃសៅរ៍ទី៣១.១០.២០២៦ នៅក្នុងសន្និសីទសារព័ត៌មានរួមមួយជាមួយលោក Zelenskyy នៅទីក្រុងអ៊ីស្តង់ប៊ុល ដោយបញ្ជាក់ថា ការវាយប្រហារលើនាវាស៊ីវិលគឺជាទង្វើដែលមិនអាចទទួលយកបានឡើយ មិនថាវាត្រូវបានប្រព្រឹត្តឡើងដោយភាគីណាក៏ដោយ។
ការពិភាក្សានេះបានធ្វើឡើងនៅថ្ងៃតែមួយ ដែលរដ្ឋមន្ត្រីការបរទេសសហរដ្ឋអាមេរិក លោក Marco Rubio បានលើកឡើងថា មានការចាប់អារម្មណ៍កាន់តែខ្លាំងឡើងពីអន្តរជាតិ ជុំវិញលទ្ធភាពនៃការឈប់បាញ់ជាបណ្តោះអាសន្ន និងក្នុងកម្រិតកំណត់មួយនៅក្នុងសមុទ្រខ្មៅ ដើម្បីធានាសុវត្ថិភាពដល់ការដឹកជញ្ជូនគ្រាប់ធញ្ញជាតិ និងថាមពលរបស់ប្រទេសទាំងពីរ។
លោក Erdogan បានមានប្រសាសន៍ថា៖ «វាច្បាស់ណាស់ថា ការវាយប្រហារលើនាវាស៊ីវិល និងសកម្មភាពនានាដែលធ្វើឱ្យភាពតានតឹងនៅក្នុងសមុទ្រខ្មៅកាន់តែធ្ងន់ធ្ងរឡើងនោះ គឺមិនផ្តល់ផលប្រយោជន៍ដល់នរណាម្នាក់ឡើយ»។
លោកបានបន្ថែមថា៖«យើងមិនអាចទទួលយកការវាយប្រហារទាំងនេះបានឡើយ មិនថាស្ថិតក្នុងកាលៈទេសៈណាក៏ដោយ មិនថាអ្នកណាជាអ្នកប្រព្រឹត្ត ឬមានហេតុផលអ្វីមកដោះសារនោះទេ»។
លោកក៏បានអំពាវនាវផងដែរថា៖ «យើងសូមអំពាវនាវឱ្យភាគីទាំងអស់ប្រកាន់ខ្ជាប់នូវការទទួលខុសត្រូវចំពោះបញ្ហានេះ»។
ប្រទេសតួគី ដែលរក្សាទំនាក់ទំនងល្អជាមួយទាំងទីក្រុងមូស្គូ និងទីក្រុងគៀវ បានបង្ហាញការមិនពេញចិត្តយ៉ាងខ្លាំងចំពោះការវាយប្រហារលើនាវាពាណិជ្ជកម្មនានា។
ទីក្រុងអង់ការ៉ា (Ankara) បានដាក់សំណើទៅកាន់រុស្ស៊ី និងអ៊ុយក្រែន ដើម្បីបញ្ចប់ការវាយប្រហារទាំងនេះ ប៉ុន្តែបានឱ្យដឹងថា មិនមានភាគីណាមួយចាត់វិធានការឆ្លើយតបតាមសំណើនោះទេ។
លោក Zelenskyy បានចោទប្រកាន់រុស្ស៊ីថា បានធ្វើឱ្យស្ថានភាពនៅក្នុងសមុទ្រខ្មៅកាន់តែលំបាក ហើយបានបញ្ជាក់ថា ផ្នែកដ៏សំខាន់មួយនៃការសន្ទនារបស់លោកជាមួយលោក Erdogan គឺផ្តោតលើបញ្ហាសន្តិសុខនៅក្នុងតំបន់នោះ៕
