មន្ត្រីម្នាក់បានឱ្យដឹងថា ជនមិនស្គាល់មុខមួយក្រុម បានដុតបំផ្លាញមជ្ឈមណ្ឌលព្យាបាលជំងឺ(អេបូឡា)មួយកន្លែង នៅក្នុងសាធារណរដ្ឋប្រជាធិបតេយ្យកុងហ្គោ កាលពីថ្ងៃសៅរ៍ទី៣១.១០.២០២៦ ខណៈដែលអាជ្ញាធរ កំពុងខិតខំទប់ស្កាត់ការផ្ទុះឡើងនៃជំងឺនេះ ដែលបង្កឡើងដោយវីរុស Bundibugyo។
សារព័ត៌មានAnadolu។
លោក Marcel Likilo គ្រូពេទ្យម្នាក់ដែលទទួលបន្ទុកតំបន់សុខាភិបាលនោះ បានឱ្យដឹងថា ហេតុការណ៍នេះបានកើតឡើងនៅព្រឹកព្រលឹម ក្នុងទីប្រជុំជនជនបទ Bafwasende នៃខេត្ត Tsopo ដែលស្ថិតនៅភាគខាងជើងកណ្តាលនៃប្រទេស។
ហេតុការណ៍នេះ បានកើតឡើងត្រឹមតែមួយសប្តាហ៍ប៉ុណ្ណោះ បន្ទាប់ពីមានហ្វូងមនុស្សបានព្រួតគ្នាវាយសម្លាប់បុគ្គលិកសុខាភិបាលម្នាក់។
ខណៈដែលបុគ្គលិករូបនោះកំពុងចុះប្រតិបត្តិការឆ្លើយតបនឹងដំណឹងអំពីការផ្ទុះជំងឺអេបូឡានៅក្នុងតំបន់នោះ។
លោក Likilo បានប្រាប់អ្នកសារព័ត៌មាននៅក្នុងទីក្រុង Kisangani ដែលជាទីរួមខេត្តថា បន្ទប់ចំនួនពីរដែលត្រូវបានរៀបចំទុកសម្រាប់អ្នកដែលសង្ស័យថា មានផ្ទុកមេរោគ ត្រូវបានគេដុតបំផ្លាញ មុនពេលដែលឆ្មាំក្នុងតំបន់បានចូលអន្តរាគមន៍ និងពន្លត់ភ្លើងនោះបាន។
លោកបន្ថែមថា ក្រុមគ្រូពេទ្យដែលត្រូវបានបញ្ជូនទៅកាន់តំបន់សុខាភិបាលនោះ ដើម្បីជួយដល់ការឆ្លើយតបនឹងជំងឺអេបូឡា បានភៀសខ្លួនទៅកាន់ទីក្រុង Kisangani ហើយអ្នកដែលសង្ស័យថាមានផ្ទុកមេរោគ ដែលកំពុងសម្រាកព្យាបាលនៅមជ្ឈមណ្ឌលនោះ ត្រូវបានបញ្ជូនបន្តទៅកាន់តំបន់ Nia-Nia ក្នុងខេត្ត Ituri ដែលនៅជាប់គ្នា។
មន្ត្រីសុខាភិបាល លើកឡើងថា ការប្រឆាំងពីសំណាក់ប្រជាពលរដ្ឋក្នុងសហគមន៍ នៅតែជាបញ្ហាប្រឈមមួយចំពោះកិច្ចខិតខំប្រឹងប្រែងក្នុងការទប់ស្កាត់វីរុសនេះ។
តួលេខចុងក្រោយពីក្រសួងសុខាភិបាលបានបង្ហាញថា ចំនួនករណីឆ្លងជំងឺ(អេបូឡា)ដែលត្រូវបានបញ្ជាក់ បានកើនឡើងលើសពី១០.០០០ករណី ក្នុងនោះមានអ្នកស្លាប់ជាង ៥.០០០នាក់ ចាប់តាំងពីពាក់កណ្តាលខែឧសភាមក៕
