យោងតាមការវិភាគរបស់ទីភ្នាក់ងារសារព័ត៌មានAssociated Press (AP)បានឱ្យដឹងថា ការវាយប្រហាររបស់អ៊ីរ៉ង់ ទៅលើមូលដ្ឋានទ័ពអាមេរិកជាង២០កន្លែង នៅក្នុងតំបន់មជ្ឈិមបូព៌ា បានផ្តោតសំខាន់លើប្រព័ន្ធផ្តល់សញ្ញាព្រមានជាមុន(early-warning systems) មុននឹងវាយប្រហារលើអាកាសយាន និងអគារនានា ដែលបណ្តាលឱ្យមានការខូចខាតដល់ឧបករណ៍យោធា.គិតជាទឹកប្រាក់រាប់ពាន់លានដុល្លារ។
សារព័ត៌មាន(AP) នៅថ្ងៃទី៣១.១០.២០២៦។
ទីភ្នាក់ងារAP បានផ្ទៀងផ្ទាត់ដោយឯករាជ្យនូវការខូចខាត ដែលកើតឡើងចំពោះគោលដៅរបស់អាមេរិក។
ដោយប្រើប្រាស់រូបភាពពីផ្កាយរណបពីប្រភពជាច្រើន និងបានសម្ភាសជាមួយមន្ត្រីក្នុងតំបន់ចំនួន៤រូប ដែលទទួលបានព័ត៌មានសង្ខេប ឬដឹងដោយផ្ទាល់អំពីទីតាំងដែលរងការវាយប្រហារ។
AP រកឃើញថា រហូតមកដល់ខែសីហា ការវាយប្រហារ ដោយយន្តហោះគ្មានមនុស្សបើក(drone) ឬមីស៊ីលជាង ១១៥លើក ។
ដែលអ៊ីរ៉ង់ ឬក្រុមប្រដាប់អាវុធដែលគាំទ្រដោយអ៊ីរ៉ង់ បានទទួលខុសត្រូវនោះ បានបង្កការខូចខាត ឬបំផ្លាញសំណង់នានានៅលើមូលដ្ឋានទ័ពចំនួន ២៦កន្លែង និងទីតាំងផ្សេងទៀតដែលមានឧបករណ៍របស់សហរដ្ឋអាមេរិក។
AP ឃើញថា នៅដំណាក់កាលដំបូង អ៊ីរ៉ង់បានផ្តោតការវាយប្រហារ ទៅលើឃ្លាំងរក្សាទុកយន្តហោះ និងប្រព័ន្ធសម្រាប់រកឃើញការវាយប្រហារដែលចូលមកដល់។
ដែលនេះជាការបើកផ្លូវសម្រាប់ការវាយប្រហារបន្តទៀតទៅលើឃ្លាំងស្តុកសម្ភារៈ កន្លែងស្នាក់នៅរបស់កងទ័ព និងទីតាំងផ្សេងៗទៀត។
ការខូចខាតទាំងនេះ បានផ្លាស់ប្តូរយ៉ាងខ្លាំងនូវវត្តមានរបស់សហរដ្ឋអាមេរិកនៅក្នុងតំបន់មជ្ឈិមបូព៌ា។
ដោយមន្ត្រីក្នុងតំបន់ពីររូបបានលើកឡើងថា អាមេរិកបានផ្លាស់ប្តូរទីតាំងទ្រព្យសម្បត្តិយោធារបស់ខ្លួនជាច្រើនចេញពីតំបន់ឈូងសមុទ្រពែរ្ស (Persian Gulf)។
មន្ត្រីម្នាក់ក្នុងចំណោមនោះបានបញ្ជាក់ថា ទ្រព្យសម្បត្តិទាំងនោះរួមមាន អាកាសយាន ប្រព័ន្ធការពារដែនអាកាស ប្រព័ន្ធទំនាក់ទំនង និងឧបករណ៍ផ្សេងៗទៀតដែលមានសារៈសំខាន់ចំពោះប្រតិបត្តិការនៅតាមមូលដ្ឋានទ័ព។
ផលប៉ះពាល់នៃការខូចខាតនេះ បានបង្កជាសំណួរអំពីសមត្ថភាពការពាររបស់អាមេរិកនៅក្នុងតំបន់។
ខណៈដែលប្រធានាធិបតី ដូណាល់ ត្រាំ កំពុងពិចារណាលើការវាយប្រហារថ្មីៗ បន្ទាប់ពីការបោះឆ្នោតពាក់កណ្តាលអាណត្តិនៅថ្ងៃអង្គារ ហើយទីក្រុងតេអេរ៉ង់ (Tehran)ក៏បានសន្យាថានឹងធ្វើការសងសឹកយ៉ាងធ្ងន់ធ្ងរផងដែរ។
ការវិលត្រឡប់ទៅរកជម្លោះប្រដាប់អាវុធវិញ អាចបង្កហានិភ័យនៃការខូចខាតបន្ថែមទៀតដែលត្រូវចំណាយប្រាក់ច្រើនដល់មូលដ្ឋានទ័ពទាំងនោះ ដែលនឹងបង្កើនភាពមិនច្បាស់លាស់ថា តើសហរដ្ឋអាមេរិកនឹងជ្រើសរើសការកសាងមូលដ្ឋានទ័ព និងឧបករណ៍របស់ខ្លួនឡើងវិញនៅក្នុងតំបន់នេះដែរឬទេ នៅពេលដែលសង្គ្រាមបានបញ្ចប់៕
