ទីភ្នាក់ងារព័ត៌មានជាតិលីបង់(NNA) បានរាយការណ៍កាលពីថ្ងៃសៅរ៍ទី៣១.១០.២០២៦ថា កងទ័ពអ៊ីស្រាអែល កំពុងសាងសង់ផ្លូវថ្មីៗកាត់តាមតំបន់ភ្នំ និងជ្រលងភ្នំនៅភាគខាងត្បូងប្រទេសលីបង់ ដើម្បីតភ្ជាប់ប៉ុស្តិ៍យោធារបស់ខ្លួន។
សារព័ត៌មានAnadolu។
យោងតាមទីភ្នាក់ងារនេះ ការសាងសង់នេះគ្របដណ្តប់លើតំបន់ភាគខាងលិច និងតំបន់កណ្តាលនៃភាគខាងត្បូងប្រទេសលីបង់ ដែលជាកន្លែងកងកម្លាំងអ៊ីស្រាអែលបានបង្កើតប៉ុស្តិ៍យោធានៅលើទឹកដីលីបង់ដែលខ្លួនកំពុងកាន់កាប់។
NNAបានឱ្យដឹងថា ការសាងសង់នេះកំពុងប្រព្រឹត្តទៅ ស្របពេលជាមួយនឹងប្រតិបត្តិការបំផ្លិចបំផ្លាញរបស់អ៊ីស្រាអែលនៅក្នុងតំបន់នោះ។
តំបន់កណ្តាលរួមមានទីប្រជុំជន Aita al-Shaab, Maroun al-Ras, Bint Jbeil និង Aitaroun។
តំបន់ Maroun al-Ras គឺជាទីតាំងដែលអាចមើលឃើញភូមិកររបស់អ៊ីស្រាអែលឈ្មោះ Avivim ដែលស្ថិតនៅម្ខាងទៀតនៃព្រំដែន។
តំបន់ភាគខាងលិចរួមមាន Naqoura, Yarine, Dhayra, Marwahin និង Alma al-Shaab ដែលជាតំបន់មានការដាក់ពង្រាយកងទ័ពលីបង់ និងកងកម្លាំងបណ្តោះអាសន្នរបស់អង្គការសហប្រជាជាតិប្រចាំនៅលីបង់ (UNIFIL)។
សកម្មភាពយោធារបស់អ៊ីស្រាអែលនេះ បានកើតឡើងបន្ទាប់ពីមានកិច្ចពិភាក្សាផ្នែកយោធា និងបច្ចេកទេសរវាងលីបង់ និងអ៊ីស្រាអែល ដែលសម្របសម្រួលដោយសហរដ្ឋអាមេរិក នៅទីក្រុង Tampa រដ្ឋ Florida កាលពីថ្ងៃទី ២០-២១ ខែតុលា។
កិច្ចប្រជុំទាំងនោះ បានបញ្ចប់ទៅដោយគ្មានការប្រកាសអំពីវឌ្ឍនភាពសំខាន់ណាមួយ ឬសេចក្តីថ្លែងការណ៍រួមឡើយ។
របាយការណ៍នានាបានបង្ហាញថា ភាគីទាំងពីរបានព្រមព្រៀងគ្នាបន្តការចរចា ទោះបីជានៅតែមានការខ្វែងគំនិតគ្នាជុំវិញការដកកងទ័ពអ៊ីស្រាអែលចេញពីលីបង់ និងការដកហូតអាវុធពីក្រុម Hezbollah ក៏ដោយ។
កិច្ចព្រមព្រៀងក្របខ័ណ្ឌមួយកាលពីខែមិថុនា បានចែងអំពីការដកកងទ័ពអ៊ីស្រាអែលជាបណ្តើរៗចេញពីទឹកដីលីបង់ដែលខ្លួនកាន់កាប់ ជាថ្នូរនឹងការដាក់ពង្រាយកងទ័ពលីបង់ និងការដកហូតអាវុធពីក្រុមប្រដាប់អាវុធនានា។
ទោះបីជាមានកិច្ចព្រមព្រៀងនេះក៏ដោយ ក៏អ៊ីស្រាអែលនៅតែបន្តប្រតិបត្តិការយោធារបស់ខ្លួននៅក្នុងប្រទេសលីបង់។
យោងតាមក្រសួងសុខាភិបាលលីបង់ ចាប់តាំងពីថ្ងៃទី២ ខែមីនាមក ការវាយប្រហារនានាបានសម្លាប់មនុស្សយ៉ាងហោចណាស់៤.៣៨៦ នាក់ ធ្វើឱ្យមនុស្ស ១២.៤០៧ នាក់រងរបួស និងបង្ខំឱ្យមនុស្សជាង១លាននាក់ត្រូវភៀសខ្លួនចេញពីលំនៅឋាន៕
