ប្រព័ន្ធផ្សព្វផ្សាយបារាំង បានរាយការណ៍ថា ព្រះរាជអាជ្ញានៅប្រទេសបារាំង បានបើកការស៊ើបអង្កេតករណីប៉ុនប៉ងមនុស្សឃាតលើប៉ូលីស បន្ទាប់ពីមានការគប់គ្រាប់បែកសាំង (Molotov cocktails)ទៅលើប៉ូលិសក្នុងអំឡុងពេល តវ៉ាកាលពីថ្ងៃទី៣១.១០.២០២៦។
សារព័ត៌មានBBC។
ប៉ូលិសម្នាក់ ដែលមានភ្លើងឆេះជើងអំឡុងពេលប៉ះទង្គិចជាមួយក្រុមអ្នកតវ៉ានៅទីក្រុងប៉ារីស កាលពីថ្ងៃសៅរ៍ បានបង្កឱ្យមានការខឹងសម្បារយ៉ាងខ្លាំង។ ហេតុការណ៍នេះ កើតឡើងបន្ទាប់ពីមានការតវ៉ាតាមដងផ្លូវអស់រយៈពេលជាច្រើនសប្តាហ៍នៅក្នុងប្រទេសបារាំង ដែលក្នុងនោះក៏មានក្រុមអ្នកតវ៉ាមួយចំនួនបានរងរបួសផងដែរ។
មន្ត្រីប៉ូលិសរូបនោះ ដែលបានរងរបួសរលាកនៅត្រង់កជើង និងរបួសស្រាលនៅដៃ បានប្រាប់កាសែតបារាំង Le Figaro ថា ឧបករណ៍បង្កអគ្គិភ័យនោះគឺ«មានលក្ខណៈស្មុគស្មាញខ្លាំង»។
រដ្ឋមន្ត្រីក្រសួងមហាផ្ទៃ លោក Laurent Nuñez បានថ្លែងថា ការគប់គ្រាប់បែកសាំងទៅលើជួរកងកម្លាំងប៉ូលិស គឺជា«អ្វីដែលខ្ញុំហៅថាជាការប៉ុនប៉ងមនុស្សឃាត»ដោយបន្ថែមថា មន្ត្រីប៉ូលិសកំពុងធ្វើការស្វែងរកជនដៃដល់។
មនុស្សរាប់សែននាក់ បានចូលរួមក្នុងការតវ៉ាដោយសន្តិវិធីភាគច្រើននៅទូទាំងប្រទេសបារាំងកាលពីថ្ងៃសៅរ៍។ នេះគឺជាព្រឹត្តិការណ៍ចុងក្រោយបំផុតនៅក្នុងការតវ៉ា ដែលដឹកនាំដោយយុវជន ដែលបានចាប់ផ្តើមតាំងពីចុងខែកញ្ញាមក ដោយទាមទារឱ្យមានវិធានការដោះស្រាយបញ្ហាថ្លៃចំណាយខ្ពស់ក្នុងការរស់នៅ និងសេវាសាធារណៈមិនល្អ ជាពិសេសនៅក្នុងវិស័យអប់រំ។
បន្ទាប់ពីមានការប៉ះទង្គិច និងការលួចប្លន់កាលពីពេលមុនៗ មន្ត្រីប៉ូលិសរាប់ពាន់នាក់ត្រូវបានដាក់ពង្រាយនៅទូទាំងប្រទេសក្នុងអំឡុងចុងសប្តាហ៍ ហើយប៉ូលិសបានបាញ់ឧស្ម័នបង្ហូរទឹកភ្នែកទៅលើក្រុមអ្នកតវ៉ានៅក្នុងទីក្រុងមួយចំនួន។
ក្រសួងមហាផ្ទៃបារាំង បានឱ្យដឹងថា មានការចាប់ខ្លួនមនុស្សជាង៧៧០ នាក់កាលពីថ្ងៃសៅរ៍។
ដែលចំនួននេះគឺប្រហែលពាក់កណ្តាលនៃចំនួនអ្នកដែលត្រូវបានចាប់ខ្លួននៅក្នុងការតវ៉ាកាលពីសប្តាហ៍មុន។
ប៉ូលិសបញ្ជាក់ថា មិនទាន់មាននរណាម្នាក់ត្រូវបានចាប់ខ្លួនពាក់ព័ន្ធនឹងការវាយប្រហារ ដែលត្រូវបានថតជាប់ក្នុងកាមេរ៉ា ដែលបណ្តាលឱ្យប៉ូលិសម្នាក់ឆេះខ្លួននោះទេ។
មន្ត្រីប៉ូលិសរូបនោះ ដែលជាសមាជិកនៃកងកម្លាំង National Gendarmerie (កងកម្លាំងអនុវត្តច្បាប់ថ្នាក់ជាតិ ដែលតាមបច្ចេកទេសគឺជាផ្នែកមួយនៃយោធា។
ប៉ុន្តែស្ថិតនៅក្រោមការគ្រប់គ្រងរបស់ក្រសួងមហាផ្ទៃ)បាននិយាយថា អង្គភាពរបស់លោក «ស្រាប់តែប្រឈមមុខនឹងក្រុមមនុស្សអមិត្តរាប់រយនាក់ ដែលមានបំពាក់ឧបករណ៍យ៉ាងពេញលេញ»។
ថ្លែងទៅកាន់កាសែតបារាំងលោក Le Figaro បាននិយាយថា ប៉ូលិសមិនទាន់កំណត់អត្តសញ្ញាណសារធាតុរាវដែលត្រូវបានប្រើប្រាស់នោះទេ ប៉ុន្តែឧបករណ៍បង្កអគ្គិភ័យនោះ «មានសមត្ថភាពឆេះខ្លាំងជាងគ្រាប់បែកសាំង (Molotov cocktail) ទូទៅទៅទៀត»។
លោកនិយាយថា៖ «យើងបានប្រឈមមុខនឹងបុគ្គលដែលមានអរិភាព លោកបាននិយាយថា អង្គភាពនេះតាមពិតគួរតែស្ថិតក្នុងថ្ងៃឈប់សម្រាក ប៉ុន្តែត្រូវបានកោះហៅត្រឡប់មកវិញជាបន្ទាន់ ដើម្បីអនុវត្តភារកិច្ចរក្សាសន្តិសុខក្នុងអំឡុងពេលការតវ៉ានៅចុងសប្តាហ៍។
ក្រុមអ្នករៀបចំការតវ៉ានៅប្រទេសបារាំង ដែលគេស្គាល់ថាជាក្រុម «អាវកាក់ពណ៌លឿង» (Gilets Jaunes) បានឱ្យដឹងថា អ្នកតវ៉ារាប់សិបនាក់បានរងរបួសធ្ងន់ធ្ងរក្នុងអំឡុងពេលការតវ៉ាថ្មីៗនេះនៅទូទាំងប្រទេស ដោយក្នុងនោះមានមនុស្សជាច្រើនបានរងរបួសដោយសារ «គ្រាប់បែក» (grenades)។
ប្រទេសបារាំង បានផ្អាកការប្រើប្រាស់គ្រាប់បែកប្រភេទមួយ (stun grenade) ក្នុងអំឡុងពេលរក្សាសន្តិសុខក្នុងការតវ៉ារបស់សិស្សនិស្សិតកាលពីដើមខែតុលា បន្ទាប់ពីក្មេងជំទង់អាយុ ១៥ ឆ្នាំម្នាក់បានដាច់ដៃដោយសារគ្រាប់បែកនោះ។
ទោះជាយ៉ាងណាក៏ដោយ កាសែតបារាំង Le Monde បានរាយការណ៍ថា ប៉ូលិសនៅតែបន្តប្រើប្រាស់គ្រាប់បែកប្រភេទផ្សេងមួយទៀតនៅក្នុងការតវ៉ាដែលកើតឡើងបន្ទាប់ពីនោះ។
ការតវ៉ាក៏បានកើតឡើងផងដែរនៅក្នុងប្រទេសអាល្លឺម៉ង់ និងអ៊ីតាលីកាលពីចុងសប្តាហ៍ ។
ខណៈដែលការតវ៉ាដែលដឹកនាំដោយយុវជនជាចម្បង នៅតែបន្តកើតមាននៅតាមតំបន់មួយចំនួនក្នុងទ្វីបអឺរ៉ុប។ ទោះបីជាមានការទាមទារខុសៗគ្នា ប៉ុន្តែជាទូទៅការតវ៉ាទាំងនេះសុទ្ធតែផ្តោតលើបញ្ហាថ្លៃចំណាយសម្រាប់ការរស់នៅ និងសេវាសាធារណៈ៕
