ក្រុមបាតុករជនជាតិជ្វីហ្វគ្រិស្តអូស្សូដក់ប្រមាណ២០០នាក់ បានប៉ះទង្គិចជាមួយប៉ូលិសអ៊ីស្រាអែលនៅទីក្រុងហ្សេរុយសាឡឹម កាលពីយប់ថ្ងៃអាទិត្យ ដើម្បីតវ៉ាប្រឆាំងនឹងការចាប់ខ្លួនបុរសម្នាក់ក្នុងសហគមន៍របស់ពួកគេ ដែលមិនបានទៅបំពេញកាតព្វកិច្ចយោធាតាមការកំណត់។
សារព័ត៌មានAnadolu Agency នៅថ្ងៃទី២ ខែវិច្ឆិកា។
ក្រុមបាតុករបានបិទផ្លូវរថភ្លើងក្នុងទីក្រុង។ ជាការឆ្លើយតប ប៉ូលិសបានប្រើគ្រាប់បែកបំបែកហ្វូងមនុស្ស និងទឹកបាញ់សម្ពាធខ្ពស់ ដើម្បីបំបែកក្រុមបាតុករ និងបើកផ្លូវឱ្យធ្វើចរាចរណ៍ឡើងវិញ។
ជម្លោះនេះកើតឡើងដោយសារសហគមន៍ជ្វីហ្វគ្រិស្តអូស្សូដក់មួយចំនួនប្រឆាំងនឹងការចូលបម្រើយោធា ដោយចង់ឱ្យសិស្សសាលាសាសនាទទួលបានការលើកលែងពីកាតព្វកិច្ចយោធា។ ប៉ុន្តែគណបក្សនយោបាយ និងក្រុមគ្រួសារទាហានមួយចំនួនទាមទារឱ្យបញ្ចប់ការលើកលែងនេះ ដើម្បីឱ្យពលរដ្ឋទាំងអស់មានកាតព្វកិច្ចដូចគ្នា។
បញ្ហាកាតព្វកិច្ចយោធានេះ ក៏កំពុងក្លាយជាឧបសគ្គដល់ការបង្កើតរដ្ឋាភិបាលថ្មីរបស់នាយករដ្ឋមន្ត្រី Benjamin Netanyahu បន្ទាប់ពីការបោះឆ្នោតសភាកាលពីថ្ងៃទី២៧ ខែតុលា។
លទ្ធផលបោះឆ្នោតបង្ហាញថា បក្សរបស់លោក Netanyahu ទទួលបាន ៥៣អាសនៈ បក្សប្រឆាំងទទួលបាន ៤៨អាសនៈ និងគណបក្សអារ៉ាប់ទទួលបាន ១៩អាសនៈ។ ដូច្នេះ មិនមានក្រុមណាមួយទទួលបាន ៦១អាសនៈ ដែលជាចំនួនចាំបាច់សម្រាប់បង្កើតរដ្ឋាភិបាលមានសំឡេងភាគច្រើនក្នុងសភា ១២០អាសនៈនោះទេ៕
