(ប៉ារីស)៖ ការតវ៉ារបស់សិស្សវិទ្យាល័យនៅប្រទេសបារាំង បានចាប់ផ្តើមឡើងវិញនៅថ្ងៃចន្ទទី០២.១១.២០២៦ ក្នុងកម្រិតតូចជាងសប្តាហ៍មុនៗ ខណៈសិស្សានុសិស្ស បានត្រឡប់ចូលរៀនវិញ ក្រោយបញ្ចប់វិស្សមកាលរយៈពេល២សប្តាហ៍។
សារព័ត៌មាន(Reuters)។
ក្រុមយុវជន បានព្យាយាមបិទច្រកចូលវិទ្យាល័យមួយចំនួន នៅក្នុងទីក្រុងប៉ារីស ម៉ាសៃ (Marseille) និងរ៉េន (Rennes)។
ក្រសួងអប់រំបារាំង បានឱ្យដឹងថា គិតត្រឹមម៉ោង០៨:៣០ ម៉ោងសកល (GMT) មានវិទ្យាល័យប្រហែល៤១ កន្លែង ឬស្មើនឹងប្រហែល១% នៃចំនួនវិទ្យាល័យសរុប នៅទូទាំងប្រទេស ត្រូវបានគេបិទច្រកចូល។
នៅក្នុងសប្តាហ៍មុន ពេលឈប់សម្រាកវិស្សមកាល វិទ្យាល័យរាប់រយកន្លែងក្នុងចំណោមវិទ្យាល័យជាង៣.០០០ កន្លែងនៅទូទាំងប្រទេសបារាំង ត្រូវបានគេបិទច្រកចូល។
ការតវ៉ាទាំងនេះ ដែលបានចាប់ផ្តើមនៅតំបន់ជាយក្រុងប៉ារីស កាលពីខែកញ្ញា បានរីករាលដាលពាសពេញប្រទេសបារាំង។
មិនត្រឹមតែពាក់ព័ន្ធនឹងវិស័យអប់រំប៉ុណ្ណោះទេ ការតវ៉ានេះបានពង្រីកវិសាលភាពទៅលើបញ្ហាថ្លៃចំណាយក្នុងការរស់នៅ ដោយទាក់ទាញការចូលរួមពីសមាជិកសហជីព និងសកម្មជននានា ហើយជួនកាលបានប្រែក្លាយទៅជាអំពើហិង្សា។
រលកនៃការតវ៉ាដែលគេហៅថាជាការតវ៉ារបស់ “ជំនាន់ Z”(Gen Z)បានកើតឡើងនៅតាមបណ្តាប្រទេសអឺរ៉ុបជាច្រើន រួមមានអាល្លឺម៉ង់ អ៊ីតាលី ប៊ែលហ្សិក និងអាល់បានី ដោយសារកត្តាដូចជាបញ្ហាថ្លៃចំណាយក្នុងការរស់នៅសភាពទ្រុឌទ្រោមនៃសាលារៀននិងបញ្ហាអំពើពុករលួយ។
កាលពីខែមុន ការតវ៉ានៅក្នុងប្រទេសបារាំង បានប្រែក្លាយទៅជាការប៉ះទង្គិចដោយហិង្សាជាមួយប៉ូលិស និងក្លាយជាកុបកម្មនៅក្នុងទីក្រុងមួយចំនួន ដែលមានការលួចប្លន់ហាងទំនិញនានា។
ព្រឹត្តិការណ៍នេះ គឺជាការសាកល្បងមួយសម្រាប់រដ្ឋាភិបាលរបស់ប្រធានាធិបតី អេម៉ានុយអែល ម៉ាក្រុង (Emmanuel Macron) ដែលជាគណបក្សកាន់អំណាចដោយមិនមានសំឡេងភាគច្រើនដាច់ខាតនៅក្នុងសភា។
បើនិយាយអំពីការបិទច្រកចូលសាលារៀន ឬនិយាយឱ្យចំជាងនេះទៅទៀត គឺការប៉ុនប៉ងបិទច្រកចូលនោះ គឺជារឿងដែលកើតឡើងក្នុងកម្រិតតិចតួចបំផុត។
រដ្ឋមន្ត្រីក្រសួងអប់រំ លោក Edouard Geffray បានប្រាប់ស្ថានីយវិទ្យុ France Inter កាលពីព្រឹកថ្ងៃចន្ទថា៖ «យើងកំពុងនិយាយអំពីចំនួនតិចតួចប៉ុណ្ណោះ គឺគ្រាន់តែជាសាលារៀនមួយចំនួនតូចប៉ុណ្ណោះ»។
លោកបានបញ្ជាក់ថា ការធ្វើបាតុកម្មគឺអាចធ្វើទៅបាន ប៉ុន្តែការរារាំងមិនឱ្យចូលទៅក្នុងសាលារៀន គឺជាសកម្មភាពខុសច្បាប់។
រូបភាពពីទូរទស្សន៍បានបង្ហាញថា មានវត្តមានមន្ត្រីប៉ូលិសនៅទីនោះ ប៉ុន្តែពួកគេមិនបានបំពាក់ឧបករណ៍ពេញលេញសម្រាប់ទប់ស្កាត់កុបកម្មនោះទេ។
សិស្សានុសិស្សទាមទារឱ្យមានការជួសជុលសាលារៀនដែលចាស់ទ្រុឌទ្រោម ការបន្ថែមចំនួនគ្រូបង្រៀន ការបង្កើនកន្លែងសិក្សានៅតាមសាកលវិទ្យាល័យ និងការលុបចោលប្រព័ន្ធចូលរៀននៅសាកលវិទ្យាល័យ ដែលពួកគេយល់ថាជាប្រព័ន្ធមិនមានភាពយុត្តិធម៌ក្នុងសង្គម។
កាលពីសប្តាហ៍មុន លោក Geffray បានស្នើកំណត់ចំនួនសិស្សក្នុងមួយថ្នាក់ឱ្យនៅត្រឹម ២៨នាក់ ការបែងចែកថវិកាចំនួន ៤ ពាន់លានអឺរ៉ូ (៤,៤៧ពាន់លានដុល្លារអាមេរិក) សម្រាប់ការជួសជុលសាលារៀន ការបង្កើតកន្លែងសិក្សាថ្មីចំនួន ១៥.០០០កន្លែងសម្រាប់និស្សិតនៅកម្រិតឧត្តមសិក្សា និងការបង្កើតប្រព័ន្ធចូលរៀនថ្មីមួយនៅត្រឹមឆ្នាំ ២០២៨។
តំណាងសិស្សវិទ្យាល័យបានលើកឡើងថា ការផ្តល់ជូនទាំងនេះនៅមិនទាន់គ្រប់គ្រាន់នៅឡើយ ហើយពួកគេនឹងបន្តធ្វើបាតុកម្មតទៅទៀត៕
