ប្រធានាធិបតីអ៊ុយក្រែន លោក Volodymyr Zelenskyy បានព្រមានកាលពីថ្ងៃទី២ ខែវិច្ឆិកា ឆ្នាំ២០២៦ ថា រុស្ស៊ីកំពុងត្រៀមបើកការវាយប្រហារទ្រង់ទ្រាយធំថ្មីលើប្រទេសអ៊ុយក្រែន ដោយផ្តោតលើហេដ្ឋារចនាសម្ព័ន្ធថាមពល និងប្រព័ន្ធដឹកជញ្ជូន។
សារព័ត៌មានAnadolu Agency។
លោក Zelenskyy បានលើកឡើងថា រុស្ស៊ីអាចកំពុងឆ្លៀតឱកាសប្រើប្រាស់ការបោះឆ្នោតពាក់កណ្តាលអាណត្តិរបស់សហរដ្ឋអាមេរិក ដើម្បីបង្វែរការចាប់អារម្មណ៍របស់សហគមន៍អន្តរជាតិចេញពីសង្គ្រាមនៅអ៊ុយក្រែន។ លោកក៏បានបញ្ជាក់ថា ប្រទេសរបស់លោកកំពុងប្រឈមនឹងបញ្ហាការពារដែនអាកាស និងកង្វះមីស៊ីលសម្រាប់ប្រព័ន្ធការពារដែនអាកាស Patriot។
លោកបានអំពាវនាវឱ្យសហគមន៍អន្តរជាតិបង្កើនសម្ពាធលើរុស្ស៊ី ជាពិសេសលើប្រាក់ចំណូលពីការលក់ប្រេង និងឧស្ម័ន ដើម្បីបង្ខំឱ្យទីក្រុងម៉ូស្គូបញ្ចប់សង្គ្រាម។
លោក Zelenskyy ក៏បាននិយាយថា អ៊ុយក្រែនមានសិទ្ធិឆ្លើយតបចំពោះរាល់ការវាយប្រហាររបស់រុស្ស៊ី ហើយការវាយប្រហារតបតរបស់អ៊ុយក្រែនកន្លងមកបានបង្កផលប៉ះពាល់ជាក់ស្តែងដល់គោលដៅរបស់រុស្ស៊ី។
ជាមួយគ្នានេះ លោកបានបញ្ជាក់ថា រុស្ស៊ីបានផ្លាស់ប្តូរយុទ្ធសាស្ត្រថ្មី ដោយមិនត្រឹមតែវាយប្រហាររោងចក្រផលិតអគ្គិសនីប៉ុណ្ណោះទេ ប៉ុន្តែថែមទាំងផ្តោតលើបណ្តាញអគ្គិសនី និងប្រព័ន្ធចែកចាយថាមពលផងដែរ។
គិតត្រឹមពេលរាយការណ៍ រុស្ស៊ីមិនទាន់បានឆ្លើយតបចំពោះការលើកឡើងចុងក្រោយរបស់លោក Zelenskyy នៅឡើយទេ៕
