សហរដ្ឋអាមេរិកបានបើកការវាយប្រហារលើគោលដៅមួយចំនួនរបស់អ៊ីរ៉ង់ នៅតំបន់ច្រកសមុទ្រ Hormuz ដោយអះអាងថា ជាការវាយប្រហារដើម្បីការពារទ្រព្យសម្បត្តិ និងកងកម្លាំងរបស់ខ្លួន។ នេះបើតាមមន្ត្រីអាមេរិកម្នាក់កាលពីថ្ងៃទី២ ខែវិច្ឆិកា ឆ្នាំ២០២៦។
សារព័ត៌មានAP។
មន្ត្រីអាមេរិកបានឱ្យដឹងថា ការវាយប្រហារនេះផ្តោតលើក្រុមអ៊ីរ៉ង់ដែលបានប្រើប្រាស់មីស៊ីលបាញ់ពីដីទៅអាកាសប្រឆាំងនឹងទ្រព្យសម្បត្តិរបស់សហរដ្ឋអាមេរិក។ ចំណែកទូរទស្សន៍រដ្ឋអ៊ីរ៉ង់បានរាយការណ៍ថា មានសំឡេងផ្ទុះនៅលើកោះ Qeshm។
ការវាយប្រហារនេះមិនទាន់បង្ហាញថា ជាការចាប់ផ្តើមសង្គ្រាមទ្រង់ទ្រាយធំឡើងវិញនោះទេ ប៉ុន្តែបានបង្កើនការព្រួយបារម្ភថា ជម្លោះរវាងប្រទេសទាំងពីរអាចកាន់តែធ្ងន់ធ្ងរ។ បច្ចុប្បន្ន សហរដ្ឋអាមេរិកនៅតែរក្សាកងទ័ពរាប់ពាន់នាក់នៅតំបន់សមុទ្រក្បែរអ៊ីរ៉ង់ ដើម្បីបន្តបិទខ្ទប់កំពង់ផែ និងរារាំងការដឹកជញ្ជូនប្រេងរបស់អ៊ីរ៉ង់ទៅកាន់ទីផ្សារពិភពលោក។
ទន្ទឹមនឹងនេះ អនុប្រធានាធិបតីអាមេរិក លោក JD Vance បានបង្ហាញសុទិដ្ឋិនិយមថា ភាគីទាំងពីរនៅតែអាចសម្រេចបានកិច្ចព្រមព្រៀងតាមរយៈការចរចា។ កាតាក៏កំពុងជួយសម្របសម្រួលការចរចារវាងអ៊ីរ៉ង់ និងភាគីពាក់ព័ន្ធផងដែរ។
ប្រភពមន្ត្រីក្នុងតំបន់បានឱ្យដឹងថា ការចរចាកំពុងពិភាក្សាលើលទ្ធភាពឱ្យអ៊ីរ៉ង់បញ្ឈប់ការវាយប្រហារនៅច្រកសមុទ្រ Hormuz ជាថ្នូរនឹងការដែលសហរដ្ឋអាមេរិកដកការបិទខ្ទប់កំពង់ផែអ៊ីរ៉ង់។
ទោះជាយ៉ាងណា នាយករដ្ឋមន្ត្រីអ៊ីស្រាអែល លោក Benjamin Netanyahu កំពុងជំរុញឱ្យលោក Donald Trump បើកការវាយប្រហារថ្មីលើអ៊ីរ៉ង់ បន្ទាប់ពីការបោះឆ្នោតពាក់កណ្តាលអាណត្តិរបស់សហរដ្ឋអាមេរិក៕
