កងឆ្មាំបដិវត្តន៍អ៊ីស្លាមអ៊ីរ៉ង់ (IRGC) បានប្រកាសកាលពីថ្ងៃព្រហស្បតិ៍ ទី៥ ខែវិច្ឆិកា ឆ្នាំ២០២៦ ថានាវាដឹកប្រេងចំនួន ២គ្រឿង និងនាវាអូសទាញមួយគ្រឿងបានឆាបឆេះនៅច្រកសមុទ្រហ័រមូស ក្នុងហេតុការណ៍ដាច់ដោយឡែកពីគ្នា បន្ទាប់ពីព្យាយាមធ្វើដំណើរតាមផ្លូវដែលអ៊ីរ៉ង់មិនអនុញ្ញាត។
សារព័ត៌មានAnadolu Agency។
តាមសេចក្តីថ្លែងការណ៍របស់កងឆ្មាំបដិវត្តន៍អ៊ីស្លាម នាវាដឹកប្រេងធំមួយគ្រឿងបានបុកមីនកាលពីយប់ថ្ងៃពុធ ខណៈព្យាយាមឆ្លងកាត់ផ្លូវដែលមិនមានការអនុញ្ញាតនៅភាគខាងត្បូងច្រកសមុទ្រ បណ្តាលឱ្យនាវាឆាបឆេះ និងត្រូវបញ្ឈប់ដំណើរ។
ក្នុងហេតុការណ៍មួយទៀត នាវាដឹកប្រេងធំមួយគ្រឿងផ្សេងទៀតបានឆាបឆេះនៅភាគខាងកើតច្រកសមុទ្រ។ សូម្បីតែនាវាអូសទាញដែលចូលទៅជួយពន្លត់ភ្លើង ក៏បានឆាបឆេះផងដែរ។
កងឆ្មាំបដិវត្តន៍អ៊ីស្លាមក៏បានចោទប្រកាន់សហរដ្ឋអាមេរិកថា កំពុងជំរុញឱ្យនាវានានាបំពានការរឹតបន្តឹង និងធ្វើដំណើរតាមផ្លូវដែលមានមីន ដែលអាចបង្កការខូចខាត និងបង្កើនថ្លៃធានារ៉ាប់រងយ៉ាងខ្ពស់ដល់អាមេរិក និងប្រទេសសម្ព័ន្ធមិត្តក្នុងតំបន់។
ជាមួយគ្នានេះ អ៊ីរ៉ង់បានអះអាងថា កងទ័ពជើងទឹករបស់ខ្លួននៅតែគ្រប់គ្រងច្រកសមុទ្រហ័រមូស និងបានព្រមានថា ការបំពានច្បាប់ធ្វើនាវាចរណ៍នៅទីនោះ នឹងធ្វើឱ្យសហរដ្ឋអាមេរិកប្រឈមនឹងការខាតបង់ផ្នែកសេដ្ឋកិច្ច និងនយោបាយបន្ថែមទៀត។
គួរបញ្ជាក់ថា ច្រកសមុទ្រហ័រមូស ស្ថិតនៅចន្លោះប្រទេសអ៊ីរ៉ង់ និងអូម៉ង់ ជាផ្លូវដឹកជញ្ជូនប្រេង និងឧស្ម័នដ៏សំខាន់របស់ពិភពលោក។ ភាពតានតឹងរវាងអ៊ីរ៉ង់ សហរដ្ឋអាមេរិក និងអ៊ីស្រាអែល បានបន្តកើនឡើង បន្ទាប់ពីការប្រយុទ្ធគ្នាបានផ្ទុះឡើងវិញកាលពីខែកក្កដា ឆ្នាំ២០២៦ ក្រោយបទឈប់បាញ់កាលពីខែមេសា៕
