ប្រទេសកូរ៉េខាងជើងបានប្រកាសថា ខ្លួនបានសាកល្បងប្រព័ន្ធមីស៊ីលការពារដែនអាកាសទំនើបដែលទើបរចនាថ្មី ព្រមទាំងធ្វើសមយុទ្ធបាញ់មីស៊ីលគ្រូសយុទ្ធសាស្ត្ររយៈចម្ងាយឆ្ងាយ ដើម្បីវាយប្រហារគោលដៅអាកាសយានដ្ឋានសិប្បនិម្មិត។
សារព័ត៌មានAnadolu Agency នៅថ្ងៃទី៥ ខែវិច្ឆិកា ឆ្នាំ២០២៦។
តាមរបាយការណ៍ ការសាកល្បងប្រព័ន្ធមីស៊ីលការពារដែនអាកាសនេះធ្វើឡើងកាលពីថ្ងៃពុធ ក្រោមការដឹកនាំរបស់ឧត្តមសេនីយ៍ គីម ជុងស៊ីក ដើម្បីពិនិត្យសមត្ថភាពបច្ចេកទេស ភាពជឿជាក់ និងសមត្ថភាពរបស់ប្រព័ន្ធក្នុងការសម្គាល់ តាមដាន និងកំណត់គោលដៅ។
នៅថ្ងៃដដែល កងកម្លាំងយោធាកូរ៉េខាងជើងក៏បានធ្វើសមយុទ្ធបាញ់មីស៊ីលគ្រូសរយៈចម្ងាយឆ្ងាយ ដោយកំណត់គោលដៅជាអាកាសយានដ្ឋានសិប្បនិម្មិត។ ទោះជាយ៉ាងណា សារព័ត៌មានរដ្ឋមិនបានបញ្ជាក់ទីតាំងនៃការសាកល្បងនេះទេ។
ការសាកល្បងអាវុធជាបន្តបន្ទាប់នេះ គឺជាលើកទី៤ ក្នុងរយៈពេលមួយសប្តាហ៍ បន្ទាប់ពីកូរ៉េខាងជើងបានសាកល្បងប្រព័ន្ធបាញ់រ៉ុក្កែតច្រើនគ្រាប់ និងក្បាលគ្រាប់បែកចង្កោម ព្រមទាំងក្បាលគ្រាប់បែកបំបែកគោលដៅរបស់មីស៊ីលគ្រូស។
ការធ្វើតេស្តអាវុធទាំងនេះកើតឡើង ស្របពេលកូរ៉េខាងត្បូង និងសហរដ្ឋអាមេរិកកំពុងធ្វើសមយុទ្ធយោធារួមគ្នា ដែលធ្វើឱ្យភាពតានតឹងរវាងកូរ៉េខាងជើង និងកូរ៉េខាងត្បូងនៅតែបន្តកើនឡើង។
គួរបញ្ជាក់ថា កូរ៉េខាងត្បូងបានចោទប្រកាន់កូរ៉េខាងជើងថា ជាប់ពាក់ព័ន្ធនឹងហេតុការណ៍ផ្ទុះនៅតំបន់គ្មានយោធា កាលពីថ្ងៃទី២១ ខែកញ្ញា ដែលបណ្តាលឱ្យទាហានកូរ៉េខាងត្បូង ៣នាក់រងរបួស។ ប៉ុន្តែកូរ៉េខាងជើងបានបដិសេធការចោទប្រកាន់នេះ៕
