ប្រទេសអារ៉ាប់រួម (UAE) កំពុងពិចារណាលើគម្រោងសាងសង់បំពង់បង្ហូរប្រេងឆៅទី៣ ដើម្បីកាត់បន្ថយការពឹងផ្អែកលើច្រកសមុទ្រហ័រមូស (Strait of Hormuz) ដែលជាផ្លូវដឹកជញ្ជូនប្រេងដ៏សំខាន់មួយរបស់ពិភពលោក។
សារព័ត៌មានAnadolu Agency នៅថ្ងៃទី៥ខែវិច្ឆិកា។
តាមរបាយការណ៍ បំពង់បង្ហូរប្រេងថ្មីនេះអាចតភ្ជាប់ពីតំបន់ឆ្នេរភាគខាងលិចរបស់អារ៉ាប់រួម ទៅកាន់កំពង់ផែហ្វូជៃរ៉ា (Fujairah) នៅឆ្នេរភាគខាងកើត ដើម្បីអនុញ្ញាតឱ្យនាវាដឹកប្រេងអាចនាំចេញបានដោយមិនចាំបាច់ឆ្លងកាត់ច្រកសមុទ្រហ័រមូស។
ទោះជាយ៉ាងណា ក្រុមហ៊ុនប្រេងជាតិអាប៊ូដាប៊ី (ADNOC) បានបដិសេធរបាយការណ៍នេះ ដោយចាត់ទុកថាជាការសន្និដ្ឋានដែលគ្មានមូលដ្ឋានច្បាស់លាស់។
បច្ចុប្បន្ន អារ៉ាប់រួមមានបំពង់បង្ហូរប្រេងមួយដែលអាចដឹកជញ្ជូនប្រេងបានប្រមាណ ២លានបារ៉ែលក្នុងមួយថ្ងៃ ពីតំបន់ផលិតប្រេងហាប់សាន ទៅកាន់កំពង់ផែហ្វូជៃរ៉ា។
ជាមួយគ្នានេះ បំពង់បង្ហូរប្រេងទី២ ដែលកំពុងសាងសង់ ត្រូវបានរំពឹងថានឹងចាប់ផ្តើមដំណើរការនៅឆ្នាំ២០២៧ ហើយអាចបង្កើនសមត្ថភាពនាំចេញប្រេងតាមកំពង់ផែហ្វូជៃរ៉ាទ្វេដង។
ក្រៅពីអារ៉ាប់រួម ប្រទេសគុយវ៉ែតក៏កំពុងពិភាក្សាជាមួយអារ៉ាប់រួម និងអារ៉ាប៊ីសាអូឌីត អំពីការស្វែងរកផ្លូវបំពង់បង្ហូរប្រេងជំនួសផងដែរ ដើម្បីកាត់បន្ថយហានិភ័យពីការរំខានដល់ការដឹកជញ្ជូនប្រេងតាមច្រកសមុទ្រហ័រមូស៕
