ការវាយប្រហាររបស់កងកម្លាំងអ៊ីស្រាអែលនៅតំបន់ហ្គាហ្សា កាលពីព្រឹកថ្ងៃព្រហស្បតិ៍ ទី៥ ខែវិច្ឆិកា ឆ្នាំ២០២៦ បានបណ្តាលឱ្យជនជាតិប៉ាឡេស្ទីនម្នាក់ស្លាប់ និង ៤នាក់ផ្សេងទៀតរងរបួស។
សារព័ត៌មានAnadolu Agency។
ប្រភពមន្ទីរពេទ្យបានឱ្យដឹងថា យន្តហោះដ្រូនអ៊ីស្រាអែលបានបាញ់មីស៊ីលចំនួន ២គ្រាប់ ទៅលើតង់ស្នាក់នៅរបស់ជនភៀសខ្លួន នៅក្រុងអាល់ហ្សាវ៉ៃដា ភាគកណ្តាលតំបន់ហ្គាហ្សា បណ្តាលឱ្យបុរសជនជាតិប៉ាឡេស្ទីនអាយុ ២៧ឆ្នាំម្នាក់ស្លាប់ និងម្នាក់ទៀតរងរបួសធ្ងន់។
នៅភាគខាងជើង ដ្រូនអ៊ីស្រាអែលបានវាយប្រហារអគារលំនៅឋានមួយក្នុងសង្កាត់អាល់ការ៉ាម៉ា បណ្តាលឱ្យមនុស្សម្នាក់រងរបួសកម្រិតមធ្យម។ ចំណែកនៅភាគខាងត្បូង មនុស្ស ២នាក់ រួមទាំងស្ត្រីម្នាក់ បានរងរបួសដោយសារការបាញ់ប្រហាររបស់កងកម្លាំងអ៊ីស្រាអែល នៅតំបន់ជុំវិញទីក្រុងខាន់យូនីស។
ប្រភពក្នុងតំបន់ក៏បានរាយការណ៍ថា កងកម្លាំងអ៊ីស្រាអែលបានបំផ្លាញផ្ទះសម្បែង និងអគារស៊ីវិលមួយចំនួននៅភាគខាងកើតទីក្រុងខាន់យូនីសផងដែរ។
ការវាយប្រហារទាំងនេះកើតឡើង ខណៈបទឈប់បាញ់ដែលចូលជាធរមានតាំងពីថ្ងៃទី១០ ខែតុលា ឆ្នាំ២០២៥ នៅតែបន្តរងការរំលោភបំពាន។
យោងតាមក្រសួងសុខាភិបាលហ្គាហ្សា ចាប់តាំងពីបទឈប់បាញ់ចូលជាធរមានមក ជនជាតិប៉ាឡេស្ទីនចំនួន ១.៦០២នាក់បានស្លាប់ និង ៥.៧៩៤នាក់រងរបួស។ ចំណែកការវាយប្រហាររបស់អ៊ីស្រាអែលចាប់តាំងពីថ្ងៃទី៨ ខែតុលា ឆ្នាំ២០២៣ មក បានសម្លាប់មនុស្សជាង ៧៤.០០០នាក់ និងធ្វើឱ្យជិត ១៧៥.០០០នាក់រងរបួស ព្រមទាំងបំផ្លាញហេដ្ឋារចនាសម្ព័ន្ធស៊ីវិលប្រមាណ ៩០% នៅតំបន់ហ្គាហ្សា៕
