អ្នកតាំងលំនៅអ៊ីស្រាអែល បានចូលដណ្តើមកាន់កាប់ផ្ទះប្រជាជនប៉ាឡេស្ទីនចំនួន៨ខ្នង កាលពីថ្ងៃពុធ នៅភូមិអាល់ឌូយុក អាល់តាថា ភាគខាងលិចទីក្រុងយេរីខូ ក្នុងតំបន់វេសប៊ែង ដែលអ៊ីស្រាអែលកំពុងកាន់កាប់។
សារព័ត៌មានAnadolu Agency នៅថ្ងៃទី៥ខែវិច្ឆិកា។
ទីភ្នាក់ងារសារព័ត៌មានផ្លូវការប៉ាឡេស្ទីន WAFA បានរាយការណ៍ថា ក្រុមអ្នកតាំងលំនៅទាំងនោះបាននាំគ្រួសារមកជាមួយ រួចបំបែកទ្វារផ្ទះ និងចូលកាន់កាប់ផ្ទះទាំងនោះ ខណៈម្ចាស់ផ្ទះមិននៅទីនោះ។
កងទ័ពអ៊ីស្រាអែលក៏បានចូលទៅក្នុងទីក្រុងយេរីខូ និងជំរំជនភៀសខ្លួននៅតំបន់នោះផងដែរ។
នៅក្នុងថ្ងៃដដែល គណៈកម្មការប្រឆាំងជញ្ជាំង និងការតាំងទីលំនៅរបស់ប៉ាឡេស្ទីន បានឱ្យដឹងថា អ៊ីស្រាអែលបានរឹបអូសដីទំហំជិត ៦២៧ហិចតា ពីភូមិចំនួន៣ នៅភាគពាយ័ព្យទីក្រុងរ៉ាម៉ាឡា ដោយប្រកាសថា ជាដីរដ្ឋ។
ដីទាំងនោះជាកម្មសិទ្ធិរបស់ភូមិបេទីលូ អាល់ម៉ាហ្សារ៉ា អាល់គិបលីយ៉ា និងឌែរ អាម៉ា។
គណៈកម្មការបានព្រមានថា ការរឹបអូសដីនេះអាចបើកផ្លូវឱ្យអ៊ីស្រាអែលពង្រីកការតាំងទីលំនៅ និងប៉ះពាល់ដល់ដីកសិកម្ម ព្រមទាំងឱកាសពង្រីកភូមិរបស់ប្រជាជនប៉ាឡេស្ទីន។
យោងតាមតួលេខផ្លូវការរបស់ប៉ាឡេស្ទីន មានអ្នកតាំងលំនៅអ៊ីស្រាអែលប្រមាណ ៧៥ម៉ឺននាក់ កំពុងរស់នៅក្នុងការតាំងទីលំនៅចំនួន ១៩៤កន្លែង និងទីតាំងចំនួន ៤០០ផ្សេងទៀត នៅទូទាំងតំបន់វេសប៊ែង រួមទាំងក្រុងយេរូសាឡឹមខាងកើត៕
