ប្រទេសបារាំង បានជួបប្រទះនឹងការតវ៉ាទូទាំងប្រទេសមួយទៀត កាលពីថ្ងៃព្រហស្បតិ៍ទី០៥.១១.២០២៦។
បន្ទាប់ពីមានភាពចលាចលអស់រយៈពេលជាច្រើនសប្តាហ៍ជុំវិញ បញ្ហាថ្លៃចំណាយក្នុងការរស់នៅ និងសេវាសាធារណៈ ដោយមានសហជីពពាណិជ្ជកម្ម និងក្រុមនិស្សិតបានប្រមូលផ្តុំអ្នកតវ៉ានៅទូទាំងប្រទេស។
សារព័ត៌មាន(រ៉យទ័រ)។
ចលនានេះបានចាប់ផ្តើម នៅចុងខែកញ្ញា ជាមួយនឹងការតវ៉ារបស់និស្សិតទាក់ទងនឹងកង្វះថវិកាសម្រាប់សាលារៀន ។
ប៉ុន្តែវាបានវិវត្តទៅជាការប្រឈមមុខកាន់តែធំទូលាយ ប្រឆាំងនឹងរដ្ឋាភិបាល ដែលបង្កឱ្យមានអំពើហិង្សានៅតាមដងផ្លូវ និងការលួចប្លន់ដ៏អាក្រក់បំផុតមួយ ដែលប្រទេសបារាំង មិនធ្លាប់ជួបប្រទះក្នុងរយៈពេលប៉ុន្មានឆ្នាំចុងក្រោយនេះ។
រដ្ឋាភិបាលបានដាក់ពង្រាយប៉ូលិស និងមន្ត្រីសន្តិសុខផ្សេងទៀតចំនួន ៧០,០០០នាក់ ដើម្បីធានាថា ការតវ៉ាចំនួន២២០លើក ដែលបានគ្រោងទុកសម្រាប់ថ្ងៃព្រហស្បតិ៍នេះ ដំណើរការទៅដោយសន្តិវិធី។
រដ្ឋាភិបាលសង្ឃឹមថា នឹងជៀសវាងការកើតឡើងវិញនូវព្រឹត្តិការណ៍ដូចការតវ៉ាទូទាំងប្រទេស កាលពីថ្ងៃទី១៧ ខែតុលា.។
ខណៈពេលនោះកងកម្លាំងសន្តិសុខមិនបានត្រៀមខ្លួនទាន់ពេលវេលា ហើយបានឈាន ទៅដល់ការប៉ះទង្គិច និងការលួចប្លន់ជាច្រើន។
តើរដ្ឋាភិបាល នឹងដោះស្រាយយ៉ាងដូចម្តេចចំពោះការត្អូញត្អែរអំពីថ្លៃចំណាយក្នុងការរស់នៅ និងសេវាសាធារណៈ..?។
រដ្ឋាភិបាល បានបង្ហាញថា ខ្លួនកំពុងពិចារណាដំឡើងប្រាក់ឈ្នួល អប្បបរមា ដែលបច្ចុប្បន្ន មានចំនួន១,៤៧៨ អឺរ៉ូ (១,៦៥៩ដុល្លារអាមេរិក) ក្នុងមួយខែ (ក្រោយកាត់ពន្ធរួច)។
តួលេខនេះត្រូវបានកំណត់តាំងពីខែមិថុនា ក្រោយពីមានការដំឡើងចំនួន ៣៥ អឺរ៉ូ ដើម្បីឆ្លើយតបទៅនឹងអត្រាអតិផរណាដែលកើនឡើង។
រហូតមកដល់ពេលនេះ រដ្ឋាភិបាលនៅតែស្ទាក់ស្ទើរ ក្នុងការអនុវត្តវិធានការទូលំទូលាយដើម្បីដោះស្រាយកំហឹងរបស់អ្នកតវ៉ាជុំវិញបញ្ហាថ្លៃចំណាយក្នុងការរស់នៅ។
ដោយសាររដ្ឋាភិបាលកំពុងព្យាយាមគ្រប់គ្រងកុំឱ្យឱនភាពថវិកាជាតិកើនឡើងហួសហេតុ។
ចំពោះក្រុមនិស្សិតវិញ រដ្ឋាភិបាលបានសន្យាថា នឹងបញ្ជូនគ្រូបង្រៀនប្រហែល ៣,០០០នាក់ ដែលមានគុណវុឌ្ឍិពេញលេញ។
ប៉ុន្តែមិនទាន់បានចាប់ផ្តើមបម្រើការងារ នៅតាមសាលារៀន ដែលកំពុងខ្វះខាតបុគ្គលិក។
លើសពីនេះ រដ្ឋាភិបាល ក៏បានសន្យាថានឹងកាត់បន្ថយចំនួនសិស្សក្នុងថ្នាក់រៀននីមួយៗ បង្កើនចំនួនបុគ្គលិកបន្ថែមទៀតនៅឆ្នាំក្រោយ និងផ្តល់ប្រាក់កម្ចីចំនួន ៤ពាន់លានអឺរ៉ូ សម្រាប់ការជួសជុលសាលារៀន។
ចលនាតវ៉ាមួយ ដែលផ្តួចផ្តើមចេញពីមូលដ្ឋាន និងទទួលបានការគាំទ្រពីសហជីពមួយចំនួន គ្រោងនឹងរៀបចំការតវ៉ាជុំថ្មីមួយទៀតនៅថ្ងៃសៅរ៍នេះ ដូចដែលពួកគេបានធ្វើជារៀងរាល់សប្តាហ៍៕
