ប្រធានាធិបតីអាមេរិក លោក ដូណាល់ ត្រាំ កាលពីថ្ងៃព្រហស្បតិ៍ ទី៥ ខែវិច្ឆិកា ឆ្នាំ២០២៦ បានចុះហត្ថលេខាលើសេចក្តីប្រកាសមួយ ដើម្បីកំណត់ការិយាល័យ Oval Office និងបន្ទប់ប្រជុំគណៈរដ្ឋមន្ត្រីនៅសេតវិមាន ជាវិមានបេតិកភណ្ឌជាតិ ក្នុងគោលបំណងរក្សាទុកទីតាំងប្រវត្តិសាស្ត្រទាំងនេះ។
សារព័ត៌មានAP។
លោក ត្រាំ បាននិយាយថា ការិយាល័យ Oval Office គឺជានិមិត្តរូបដ៏សំខាន់របស់សហរដ្ឋអាមេរិក ហើយមិនគួរត្រូវបានបំផ្លាញ ឬកែប្រែរចនាសម្ព័ន្ធដោយគ្មានការពិចារណាឡើយ។
ទោះជាយ៉ាងណា សេចក្តីប្រកាសនេះមិនបានហាមឃាត់ប្រធានាធិបតីជំនាន់ក្រោយពីការផ្លាស់ប្តូរការតុបតែង គ្រឿងសង្ហារិម ឬការកែសម្រួលធម្មតានៅក្នុងការិយាល័យនោះទេ។ ប្រធានាធិបតីជំនាន់ក្រោយក៏អាចលុបចោលការកំណត់នេះបានផងដែរ។
សេចក្តីប្រកាសបានកំណត់ថា ការកែប្រែធំៗដែលអាចប៉ះពាល់ដល់រចនាសម្ព័ន្ធ និងលក្ខណៈស្ថាបត្យកម្មប្រវត្តិសាស្ត្រ ត្រូវឆ្លងកាត់ការពិនិត្យ និងពិចារណាជាមុន។
ការប្រកាសនេះធ្វើឡើងបន្ទាប់ពីគណបក្សសាធារណរដ្ឋរបស់លោក ត្រាំ បានរងបរាជ័យក្នុងការបោះឆ្នោតពាក់កណ្តាលអាណត្តិ កាលពីថ្ងៃអង្គារ។ ទន្ទឹមនឹងនេះ លោកក៏បានបន្តផ្តោតលើគម្រោងកែលម្អសំណង់នានានៅទីក្រុងវ៉ាស៊ីនតោន រួមទាំងគម្រោងសាងសង់សាលជប់លៀងដ៏ប្រណីតនៅសេតវិមានផងដែរ៕
