ប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡេនស្គី បានប្រកាសកាលពីថ្ងៃព្រហស្បតិ៍ ទី៦ ខែវិច្ឆិកា ឆ្នាំ២០២៦ ថា ប្រទេសអេស្ប៉ាញបានផ្តល់ជំនួយយោធាថ្មីដល់អ៊ុយក្រែន ក្នុងទឹកប្រាក់ចំនួន៤៨៩លានដុល្លារអាមេរិក។
សារព័ត៌មានAnadolu Agency។
ការប្រកាសនេះធ្វើឡើងបន្ទាប់ពីលោក ហ្សេឡេនស្គី បានជួបពិភាក្សាជាមួយនាយករដ្ឋមន្ត្រីអេស្ប៉ាញ លោក ពេដ្រូ សាន់ឆេស នៅទីក្រុងម៉ាឌ្រីដ ដើម្បីពិភាក្សាអំពីតម្រូវការការពារជាតិដ៏សំខាន់របស់អ៊ុយក្រែន។
លោក ហ្សេឡេនស្គី បានលើកឡើងថា រុស្ស៊ីកំពុងបន្តវាយប្រហារលើហេដ្ឋារចនាសម្ព័ន្ធសំខាន់ៗរបស់អ៊ុយក្រែន ដូចជា ប្រព័ន្ធថាមពល បណ្តាញដឹកជញ្ជូន និងផ្លូវរថភ្លើង។ ជាពិសេស នៅឆ្នាំនេះ រុស្ស៊ីបានបំផ្លាញក្បាលរថភ្លើងរបស់អ៊ុយក្រែនច្រើនជាងឆ្នាំទាំងអស់ចាប់តាំងពីសង្គ្រាមចាប់ផ្តើមមក។
លោកក៏បានបញ្ជាក់ថា ប្រព័ន្ធអគ្គិសនី និងការផ្គត់ផ្គង់ទឹកស្អាតរបស់អ៊ុយក្រែនកំពុងរងការវាយប្រហារជាបន្តបន្ទាប់ ដែលធ្វើឱ្យស្ថានភាពកាន់តែលំបាក ជាពិសេសនៅទីក្រុងកៀវ។ ដូច្នេះ ជំនួយមនុស្សធម៌ក៏មានសារៈសំខាន់ខ្លាំងផងដែរ។
ជាការឆ្លើយតប លោក ពេដ្រូ សាន់ឆេស បានបញ្ជាក់ថា អេស្ប៉ាញនឹងបន្តគាំទ្រប្រជាជនអ៊ុយក្រែន ព្រោះការការពារសេរីភាពរបស់អ៊ុយក្រែន គឺជាការការពារច្បាប់អន្តរជាតិ អធិបតេយ្យភាពរបស់ប្រទេសនានា និងគម្រោងសហប្រតិបត្តិការរបស់អឺរ៉ុបផងដែរ៕
