មនុស្សចំនួន៧នាក់ត្រូវបានប៉ូលិសចាប់ខ្លួន បន្ទាប់ពីមានអំពើហិង្សាកើតឡើងក្នុងពិធីបុណ្យ Bonfire Night នៅតំបន់មួយចំនួនក្នុងប្រទេសស្កុតឡែន ដោយមានការដុតរថយន្តប៉ូលិសមួយគ្រឿង និងគប់កាំជ្រួចដាក់ក្រុមសង្គ្រោះបន្ទាន់។
សារព័ត៌មានBBC news នៅថ្ងៃទី៦ខែវិច្ឆិកា។
ហេតុការណ៍នេះបានកើតឡើងនៅទីក្រុង Glasgow ដែលប៉ូលិសម្នាក់ និងបុគ្គលិករថយន្តសង្គ្រោះបន្ទាន់ម្នាក់បានរងរបួសស្រាល បន្ទាប់ពីត្រូវបានគប់កាំជ្រួច ខណៈកំពុងបំពេញការងារជួយបុរសម្នាក់ដែលរងរបួស។ រថយន្តប៉ូលិសមួយគ្រឿងត្រូវបានដុតបំផ្លាញទាំងស្រុងនៅតំបន់ Greenside Street ហើយក្មេងប្រុសអាយុ ១៦ឆ្នាំម្នាក់ត្រូវបានចាប់ខ្លួន។
ក្រៅពីនេះ ប៉ូលិស និងប្រជាពលរដ្ឋនៅទីក្រុង Edinburgh ក៏ត្រូវបានគប់កាំជ្រួចដាក់ផងដែរ។ ក្រុមពន្លត់អគ្គិភ័យនៅតាមទីក្រុងមួយចំនួនក៏រងការវាយប្រហារដែរ ប៉ុន្តែមិនមានអ្នកពន្លត់អគ្គិភ័យរងរបួស ឬខូចខាតរថយន្តពន្លត់អគ្គិភ័យធ្ងន់ធ្ងរឡើយ។
មន្ត្រីប៉ូលិសជាន់ខ្ពស់ លោក David Robertson បានថ្កោលទោសអំពើហិង្សានេះ និងបញ្ជាក់ថា អាជ្ញាធរនឹងបើកការស៊ើបអង្កេតយ៉ាងម៉ត់ចត់ ដើម្បីកំណត់អត្តសញ្ញាណអ្នកពាក់ព័ន្ធ និងនាំពួកគេមកទទួលខុសត្រូវចំពោះមុខច្បាប់។
តាមរបាយការណ៍របស់សេវាពន្លត់អគ្គិភ័យ និងសង្គ្រោះស្កុតឡែន បានឱ្យដឹងថា ចន្លោះពីម៉ោង ៥:៣០ល្ងាច ដល់ ១១:៣០យប់ មានការហៅស្នើសុំជំនួយពាក់ព័ន្ធនឹងកាំជ្រួច និងភ្លើងបូណ៍ហ្វាយចំនួនជាង ១.១៧២លើក ហើយក្រុមសង្គ្រោះបានចេញអន្តរាគមន៍ជាង ៧៦៧ករណី។
ជាមួយគ្នានេះ ចន្លោះពីថ្ងៃទី៣១ ខែតុលា ដល់ថ្ងៃទី៥ ខែវិច្ឆិកា ឆ្នាំ២០២៦ ប៉ូលិសទទួលបានការហៅរាយការណ៍ហេតុការណ៍ពាក់ព័ន្ធនឹងកាំជ្រួចចំនួន ១.០២៤លើក កើនឡើងពី ៨៣៣លើកក្នុងឆ្នាំ២០២៥។
ទោះបីចំនួនការហៅសុំជំនួយកើនឡើងក៏ដោយ ក៏ប៉ូលិសបានបញ្ជាក់ថា ចំនួនហេតុការណ៍ធ្ងន់ធ្ងរដែលត្រូវការកម្លាំងបង្ក្រាបពិសេសមានការថយចុះ៕
