នៅថ្ងៃសុក្រ ទី៧ ខែវិច្ឆិកា ផ្សារហ៊ុនអាមេរិកបានបិទការជួញដូរ ដោយមានលទ្ធផលខុសៗគ្នា បន្ទាប់ពីបានធ្លាក់ចុះខ្លាំងកាលពីថ្ងៃព្រហស្បតិ៍ ដោយសារភាពមិនប្រាកដប្រជានៃស្ថានការណ៍នៅមជ្ឈិមបូព៌ា។
សារព័ត៌មានAnadolu Agency។
សន្ទស្សន៍ Dow Jones បានធ្លាក់ចុះ ០,៤៦% ខណៈ S&P 500 កើនឡើង ០,៣១% និង Nasdaq កើនឡើង ១,០៩%។ ការកើនឡើងនៃផ្សារហ៊ុន Nasdaq និង S&P 500 បង្ហាញថា ទោះបីមានភាពតានតឹងផ្នែកនយោបាយក៏ដោយ ក៏ការជួញដូរភាគហ៊ុនមួយចំនួននៅតែមានភាពរឹងមាំ។
ចំណែកប្រធានាធិបតីអាមេរិក លោក ដូណាល់ ត្រាំ បាននិយាយថា សហរដ្ឋអាមេរិកកំពុងពិភាក្សាជាមួយអ៊ីរ៉ង់ ហើយអះអាងថា អាមេរិកកំពុងស្ថិតក្នុងស្ថានភាពល្អប្រសើរក្នុងការប្រឈមមុខជាមួយទីក្រុងតេអេរ៉ង់។
ទន្ទឹមនឹងនេះ សេដ្ឋកិច្ចអាមេរិកបានបង្កើតការងារថ្មីចំនួន ១៦៥.០០០ កន្លែងក្នុងខែតុលា ដែលខ្ពស់ជាងការរំពឹងទុករបស់អ្នកវិភាគចំនួន ៦៥.០០០ កន្លែង។ អត្រាអ្នកអត់ការងារធ្វើក៏បានធ្លាក់ចុះមកត្រឹម ៤,១% ផងដែរ។
ចំពោះទីផ្សារថាមពល តម្លៃប្រេងឆៅ Brent បានធ្លាក់ចុះ ០,៣៩% មកនៅត្រឹម ៩៧,៩ ដុល្លារក្នុងមួយបារ៉ែល ខណៈតម្លៃមាសបានធ្លាក់ចុះ ០,៦៥% មកនៅត្រឹម ៤.០៦៥ ដុល្លារក្នុងមួយអោន។
ដោយឡែក ផ្សារហ៊ុនអឺរ៉ុបបានបិទសប្តាហ៍ក្នុងទិសដៅធ្លាក់ចុះទាំងអស់ ដោយសន្ទស្សន៍ Stoxx Europe 600 ធ្លាក់ចុះ ១%។ ផ្សារហ៊ុនអាល្លឺម៉ង់ធ្លាក់ចុះ ១,៩២% អង់គ្លេសធ្លាក់ចុះ ១,០១% និងបារាំងធ្លាក់ចុះ ០,៨១%។
សូមបញ្ជាក់ថា៖ ភាពតានតឹងនៅមជ្ឈិមបូព៌ានៅតែជាកត្តាសំខាន់ដែលបង្កភាពមិនប្រាកដប្រជាដល់ទីផ្សារហិរញ្ញវត្ថុពិភពលោក បើទោះបីជាសេដ្ឋកិច្ចអាមេរិកបង្ហាញសញ្ញាវិជ្ជមានតាមរយៈការកើនឡើងនៃការងារក៏ដោយ៕
