លោក Santiago Peña ប្រធានាធិបតីប៉ារ៉ាហ្គាយ ដែលត្រូវបានទម្លាក់ពីតំណែង ត្រូវបានដាក់ឱ្យស្ថិតនៅក្រោមការឃុំខ្លួនក្នុងផ្ទះ កាលពីថ្ងៃសុក្រទី០៦.១១.២០២៦ ដោយមានការសង្ស័យពីបទរំលោភលើទំនុកចិត្ត និងការប្រើប្រាស់ឥទ្ធិពល ដើម្បីផលប្រយោជន៍ផ្ទាល់ខ្លួន(influence peddling) រួមទាំងការចោទប្រកាន់ផ្សេងទៀត។
សារព័ត៌មាន(AP)។
ហេតុការណ៍នេះកើតឡើងភ្លាមៗ បន្ទាប់ពីព្រឹទ្ធសភា បានបោះឆ្នោតទម្លាក់លោកចេញពីតំណែង។
ពាក់ព័ន្ធនឹងការដួលរលំ នៃធនាគារមួយដែលមានទំនាក់ទំនងជាមួយរដ្ឋាភិបាល ដែលបណ្តាលឱ្យប្រជាជនជិតពាក់កណ្តាលនៃចំនួនប្រជាជនសរុប៦ លាននាក់ របស់ប្រទេសនេះ មិនអាចដកប្រាក់សន្សំរបស់ពួកគេបាន។
សមាជិកព្រឹទ្ធសភាទាំង៤៤ រូបដែលមានវត្តមាន បានបោះឆ្នោតគាំទ្រការទម្លាក់លោក Peña ចេញពីតំណែង ដោយចោទប្រកាន់ពីបទប្រព្រឹត្តខុសក្នុងមុខតំណែង។
នេះធ្វើឱ្យលោកក្លាយជាប្រធានាធិបតីប៉ារ៉ាហ្គាយទី២ ដែលត្រូវបានទម្លាក់ចេញពីតំណែងតាមរយៈនីតិវិធីចោទប្រកាន់ (impeachment) ចាប់តាំងពីរបបផ្តាច់ការរយៈពេល ៣៥ ឆ្នាំរបស់ឧត្តមសេនីយ៍ Alfredo Stroessner បានបញ្ចប់ទៅនៅឆ្នាំ ១៩៨៩។
នៅពេលសេចក្តីសម្រេចត្រូវបានប្រកាស ដែលជាការបញ្ចប់នូវអ្វីដែលធ្លាប់ត្រូវបានគេមើលឃើញថាជារដ្ឋបាលប្រធានាធិបតីដែលមានស្ថិរភាពបំផុតមួយនៅអាមេរិកខាងត្បូងនោះ ហ្វូងមនុស្សដែលប្រមូលផ្តុំគ្នានៅទីលានខាងមុខអគារសភា បានស្រែកហ៊ោឡើង។
អ្នកដាក់ប្រាក់បញ្ញើ អ្នកចូលនិវត្តន៍ និងសិស្សនិស្សិតដែលស្លៀកពាក់អាវក្រុមបាល់ទាត់ជម្រើសជាតិ បានគ្រវីទង់ជាតិប៉ារ៉ាហ្គាយ ច្រៀង និងឱបគ្នា ដោយស្រែកពាក្យស្លោកថា«កុំឱ្យមានរបបផ្តាច់ការទៀតឡើយ!»។
អាជ្ញាធរត្រួតពិនិត្យបានចូលកាន់កាប់ធនាគារ Ueno (Ueno Bank) កាលពី៣ ថ្ងៃមុន ដែលបានបង្កឱ្យមានការភ្ញាក់ផ្អើលយ៉ាងខ្លាំងនៅក្នុងប្រព័ន្ធហិរញ្ញវត្ថុ និងបង្កជាវិបត្តិនយោបាយដ៏ធ្ងន់ធ្ងរបំផុតរបស់ប្រទេសនេះ ក្នុងរយៈពេលជាងមួយទសវត្សរ៍មកនេះ។
ប្រធានាធិបតីដែលត្រូវបានទម្លាក់ពីតំណែង ស្ថិតនៅក្រោមការឃុំខ្លួនក្នុងផ្ទះលោក Peña ត្រូវបានបញ្ជាឱ្យស្នាក់នៅក្នុងលំនៅឋានមួយរបស់លោកក្នុងទីក្រុងអាស៊ុនស្យុង រហូតដល់លោកត្រូវបង្ហាញខ្លួននៅចំពោះមុខព្រះរាជអាជ្ញានៅព្រឹកថ្ងៃសៅរ៍។
លោកប្រឈមនឹងការចោទប្រកាន់ពីបទរំលោភលើទំនុកចិត្ត ការប្រើប្រាស់ឥទ្ធិពលដើម្បីផលប្រយោជន៍ផ្ទាល់ខ្លួន និងការប្រើប្រាស់តំណែងសាធារណៈដើម្បីផលប្រយោជន៍ផ្ទាល់ខ្លួន ដែលបទល្មើសធ្ងន់ធ្ងរបំផុតអាចមានទោសជាប់ពន្ធនាគាររហូតដល់១០ឆ្នាំ។
សមាជិកសភា បានចោទប្រកាន់លោកថា បានប្រើប្រាស់ឥទ្ធិពលនយោបាយរបស់ខ្លួន ដើម្បីបញ្ជូនថវិការដ្ឋរាប់រយលានដុល្លារទៅក្នុងធនាគារUeno។
ខណៈដែលអាជ្ញាធរ ត្រួតពិនិត្យបានមើលរំលងសកម្មភាពផ្តល់ប្រាក់កម្ចីដែលមានហានិភ័យខ្ពស់ដល់បុគ្គលដែលមានទំនាក់ទំនងផ្ទៃក្នុងធនាគារ។
លោក Peña អនុប្រធានាធិបតី Pedro Alliana បានស្បថចូលកាន់តំណែងជាប្រធានាធិបតីកាលពីថ្ងៃសុក្រ ដើម្បីបំពេញអាណត្តិដែលនៅសល់ រហូតដល់ខែសីហា ឆ្នាំ ២០២៨។
លោក Alliana ដែលខ្លួនឯងក៏កំពុងស្ថិតក្រោមការស៊ើបអង្កេតពាក់ព័ន្ធនឹងធនាគារនេះដែរ បានថ្លែងថា៖«ប្រទេសប៉ារ៉ាហ្គាយ ដែលយើងទទួលបាននៅថ្ងៃនេះ កំពុងមានតម្រូវការបន្ទាន់ជាច្រើន»។
លោកបានទទួលបន្តការដឹកនាំរដ្ឋាភិបាលមួយ ដែលកំពុងស្ថិតក្រោមសម្ពាធយ៉ាងខ្លាំង ក្នុងការទាមទារឱ្យសងប្រាក់ជូនអ្នកដាក់ប្រាក់បញ្ញើវិញ និងដាក់ទោសទណ្ឌចំពោះអ្នកដែលត្រូវទទួលខុសត្រូវ។
នៅក្នុងសារលាគ្នា មុនពេលសាលក្រមត្រូវបានប្រកាស លោក Peña បានលើកឡើងថា លោកមិនចង់ឱ្យ«វត្តមានរបស់លោក ក្លាយជាមូលហេតុដែលនាំឱ្យមានការបែកបាក់ ឬអស្ថិរភាពកាន់តែខ្លាំងឡើងនោះទេ»។
លោកបានសរសេរថា៖«ខ្ញុំសូមលាគ្នាដោយក្តីដឹងគុណ ប៉ុន្តែខ្ញុំក៏មិនបានព្រងើយកន្តើយចំពោះទុក្ខវេទនារបស់អ្នកដែលកំពុងរង់ចាំចម្លើយនៅថ្ងៃនេះដែរ»។
កំហឹងរបស់សាធារណជនកាន់តែផ្ទុះឡើងខ្លាំងពីមួយថ្ងៃទៅមួយថ្ងៃ។ នៅពេលដែលសមាជិកព្រឹទ្ធសភាកំពុងពិភាក្សាគ្នា កាលពីថ្ងៃសុក្រ ក្រុមអ្នកតវ៉ាដែលទាមទារឱ្យសងប្រាក់សន្សំដែលត្រូវបានបង្កកត្រឡប់មកវិញ និងទាមទារឱ្យមានការទទួលខុសត្រូវចំពោះការបរាជ័យរបស់ធនាគារ Ueno បានដើរហែក្បួនកាត់កណ្តាលទីក្រុង Asunción ដោយស្រែកថា៖ «Santi Peña ទៅ Tacumbú!»។
ឃ្លានេះសំដៅទៅលើពន្ធនាគារដ៏សំខាន់មួយនៅរដ្ឋធានី ដែលបច្ចុប្បន្នជាកន្លែងឃុំខ្លួនលោក Miguel Vázquez ស្ថាបនិក និងជាអតីតនាយកប្រតិបត្តិរបស់ធនាគារ Ueno៕
