លោក Pedro Alliana បានស្បថចូលកាន់តំណែងជាប្រធានាធិបតីថ្មីនៃប្រទេសប៉ារ៉ាហ្គាយ កាលពីថ្ងៃសុក្រទី០៦.១១.២០២៦ ដោយបានសន្យាភ្លាមៗថា នឹងផ្តល់សំណងហិរញ្ញវត្ថុពេញលេញ ដល់ប្រជាជនប៉ារ៉ាហ្គាយរាប់លាននាក់ ដែលរងផលប៉ះពាល់ពីការដួលរលំដ៏ធ្ងន់ធ្ងរ នៃធនាគារឌីជីថល Ueno Bank។
សារព័ត៌មានAnadolu។
លោក Alliana ដែលធ្លាប់កាន់តំណែងជាអនុប្រធានាធិបតី បានឡើងកាន់តំណែងក្នុងសម័យប្រជុំវិសាមញ្ញនៃសភា ភ្លាមៗបន្ទាប់ពីសមាជិកសភាបានបោះឆ្នោតទម្លាក់អតីតប្រធានាធិបតី Santiago Pena ចេញពីតំណែង ដោយសារពាក់ព័ន្ធនឹងវិបត្តិធនាគារនេះ។
លោក Alliana បានថ្លែងនៅក្នុងសុន្ទរកថា បន្ទាប់ពីឡើងកាន់តំណែង ភ្លាមៗក្រោយពីប្រធានព្រឹទ្ធសភា លោក Basilio Nunez បានបំពាក់ខ្សែបូប្រធានាធិបតីជូនលោកថា៖ អ្វីដែលខ្ញុំសន្យានៅពេលនេះ គឺជារឿងជាក់ស្តែង៖ ជនរួមជាតិរបស់យើងដែលកំពុងជួបប្រទះគ្រាលំបាកដោយសារវិបត្តិហិរញ្ញវត្ថុនេះ នឹងទទួលបានសំណងពេញលេញ យើងនឹងមិនទុកឱ្យពួកគេប្រឈមមុខនឹងបញ្ហានេះតែម្នាក់ឯងឡើយ»។
ប៉ុន្មាននាទីបន្ទាប់ពីព្រឹទ្ធសភាបានសម្រេចថាគាត់មានកំហុស លោក Pena ត្រូវបានចាប់ខ្លួននៅគេហដ្ឋានឯកជនរបស់គាត់ ក្នុងតំបន់លំនៅដ្ឋានមួយនៃរដ្ឋធានី Asuncion ដែលមានចម្ងាយ ២០នាទីពីវិមានរដ្ឋសភា។
ការិយាល័យព្រះរាជអាជ្ញាបានស្នើសុំឱ្យមានការឃុំខ្លួនលោក Pena ជាបន្ទាន់ ក្រោមការចោទប្រកាន់ពីបទជម្លោះផលប្រយោជន៍ ការចរចាខុសច្បាប់ និងការកិបកេងប្រាក់ ដែលពាក់ព័ន្ធនឹងការដួលរលំនៃធនាគារ Ueno Bank។
មុនពេលការបោះឆ្នោតទម្លាក់គាត់ចេញពីតំណែងដោយសំឡេង៤៤ ទល់នឹង០ លោក Pena បានដាក់លិខិតលាលែងពីតំណែងទៅកាន់សភា ដើម្បីកាត់បន្ថយវិបត្តិនយោបាយ។
នៅក្នុងសេចក្តីថ្លែងការណ៍លាលែងពីតំណែង លោក Pena បានសរសេរថា៖ «ខ្ញុំលាលែងពីតំណែងដើម្បីចៀសវាងការខូចខាតបន្ថែមទៀតដល់ប្រទេសជាតិ និងដើម្បីជួយស្តារភាពស្ងប់ស្ងាត់ឡើងវិញនៅក្នុងប្រទេសប៉ារ៉ាហ្គាយ។
មិនគួរមានបុគ្គលណាម្នាក់ក្លាយជាមូលហេតុដែលនាំឱ្យមានការបែកបាក់ ឬអស្ថិរភាពកាន់តែខ្លាំងនោះទេ។
ខ្ញុំចាកចេញពីតំណែងដោយក្តីដឹងគុណ ប៉ុន្តែក៏មានអារម្មណ៍ឈឺចាប់ជំនួសអ្នកដែលកំពុងរង់ចាំចម្លើយនៅពេលនេះផងដែរ»។
វិបត្តិនយោបាយនេះបានផ្ទុះឡើងកាលពីដើមសប្តាហ៍នេះ នៅពេលដែលធនាគារកណ្តាលនៃប្រទេសប៉ារ៉ាហ្គាយ (BCP) បានចូលអន្តរាគមន៍ក្នុងធនាគារ Ueno Bank បន្ទាប់ពីរកឃើញថាធនាគារនេះខ្វះខាតលទ្ធភាពសងបំណុលយ៉ាងធ្ងន់ធ្ងរ។
ការបិទទ្វារធនាគារនេះ បានធ្វើឱ្យទ្រព្យសម្បត្តិរបស់អតិថិជនចំនួន ២,៩៤ លាននាក់ ត្រូវជាប់គាំង (មិនអាចដកបាន)។
ចំនួននេះស្មើនឹងជិតពាក់កណ្តាលនៃចំនួនប្រជាជនសរុបរបស់ប្រទេសប៉ារ៉ាហ្គាយ រួមទាំងស្ថាប័នសាធារណៈធំៗ និងមូលនិធិ នៅក្នុងបទបញ្ជាប្រតិបត្តិដំបូងរបស់លោក Alliana លោកបានណែនាំឱ្យស្ថាប័នត្រួតពិនិត្យហិរញ្ញវត្ថុពន្លឿនយន្តការបើកប្រាក់សង ដោយផ្តល់អាទិភាពដល់គណនីរបស់អ្នកមានចំណូលទាប និងអ្នកដាក់ប្រាក់តូចតាច ដែលរងផលប៉ះពាល់ធ្ងន់ធ្ងរបំផុតពីការបង្កកប្រាក់។
លោក Alliana នឹងបំពេញតួនាទីក្នុងអាណត្តិប្រធានាធិបតីដែលនៅសល់ (សម្រាប់រយៈពេលឆ្នាំ ២០២៣-២០២៨) ក្នុងគ្រាដែលប្រទេសប៉ារ៉ាហ្គាយកំពុងជួបការលំបាកក្នុងការធ្វើឱ្យវិស័យហិរញ្ញវត្ថុរបស់ខ្លួនមានស្ថិរភាព ចំពេលដែលមានភាពចលាចលក្នុងសង្គមយ៉ាងទូលំទូលាយ៕
