(ភ្នំពេញ)៖ សមាគមសិល្បករខ្មែរ នៅព្រឹកថ្ងៃទី០៧ ខែវិច្ឆិកា ឆ្នាំ២០២៦ បានផ្ញើសារចូលរួមរំលែកទុក្ខ ចំពោះមរណភាពលោក រតនៈ ពិសិដ្ឋ តារាចម្រៀង និងជាអ្នកសម្តែងដ៏មានទេពកោសល្យ ដែលលោកបានទទួលមរណភាព ដោយសារគាំងបេះដូង នៅក្នុងទីក្រុងឡុងប៊ិច រដ្ឋកាលីហ្វ័រញ៉ា សហរដ្ឋអាមេរិក!។
សមាគមសិល្បករខ្មែរ ចាត់ទុកថា ការបាត់បង់លោក រតនៈ ពិសិដ្ឋ គឺជាការបាត់បង់ធនធានសិល្បៈមួយរូប ដែលធ្លាប់បានបន្សល់ទុកនូវស្នាដៃ និងអនុស្សាវរីយ៍ល្អៗក្នុងដួងចិត្តអ្នកគាំទ្រ។
សមាគមសិល្បករខ្មែរ បានបួងសួងឱ្យវិញ្ញាណក្ខន្ធលោក រតនៈ ពិសិដ្ឋ បានទៅកាន់សុគតិភព កុំបីឃ្លៀងឃ្លាតឡើយ។
សូមចូលរួមរំលែកទុក្ខដ៏ជ្រាលជ្រៅជាមួយក្រុមគ្រួសារ សាច់ញាតិ មិត្តភក្តិ និងអ្នកគាំទ្រទាំងអស់។
សូមវិញ្ញាណក្ខន្ធលោក រតនៈ ពិសិដ្ឋ បានទៅកាន់សុគតិភព សូមឱ្យស្នាដៃ និងអនុស្សាវរីយ៍របស់លោកស្ថិតនៅក្នុងការចងចាំរបស់មហាជន និងមិត្តរួមអាជីពជានិច្ច។
លោក រតនៈ ពិសិដ្ឋ ជាតារាសម្ដែង, តារាចម្រៀង និងជាពិធីករដ៏មានប្រជាប្រិយភាពម្នាក់នៅកម្ពុជា ដែលត្រូវបានគេស្គាល់តាមរយៈ ការសម្តែងភាពយន្តជាតួអង្គឯក ក្នុងរឿង នរណា Comeback។
លោកក៏តែងតែលេចវត្តមានក្នុងកម្មវិធីសិល្បៈតូចធំនានា ហើយត្រូវបានទស្សនិកជនសរសើរ មិនដាច់ពីមាត់ចំពោះសមត្ថភាព និងទេពកោសល្យសិល្បៈរបស់លោក។
លោកបានទទួលមរណភាព នៅថ្ងៃទី ០៧ ខែវិច្ឆិកា ឆ្នាំ ២០២៦ ទាំងវ័យនៅក្មេងនៅសហរដ្ឋអាមេរិក.!៕
