កាលពីថ្ងៃទី៨ ខែវិច្ឆិកា ឆ្នាំ២០២៦ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បានឱ្យដឹងថា ការវាយប្រហាររបស់រុស្ស៊ីលើហេដ្ឋារចនាសម្ព័ន្ធថាមពល បានធ្វើឱ្យប្រជាជនជាង៦០០.០០០នាក់នៅទីក្រុងឌីនីប្រូ និងតំបន់ជុំវិញ គ្មានអគ្គិសនីប្រើប្រាស់។
សារព័ត៌មានAnadolu Agency។
លោកក៏បានបញ្ជាក់ថា ស្ថានភាពនៅតំបន់ខាកៀវ ក៏មានការលំបាកផងដែរ ដោយតំបន់ជាច្រើនរងផលប៉ះពាល់ពីការដាច់ចរន្តអគ្គិសនី។
ចំណែកនៅតំបន់ហ្ស៊ីតូមៀ អគារស្នាក់នៅចំនួន១៤០ខ្នង ក៏គ្មានប្រព័ន្ធកម្ដៅប្រើប្រាស់ បន្ទាប់ពីការបាញ់ផ្លោងរបស់រុស្ស៊ី។
លោកហ្សេលេនស្គីបានបន្ថែមថា ក្នុងរយៈពេលមួយសប្តាហ៍កន្លងមក រុស្ស៊ីបានបាញ់មីស៊ីលចំនួន ១១៥គ្រាប់ ទម្លាក់គ្រាប់បែកពីលើអាកាសជិត ១.៩០០គ្រាប់ និងប្រើប្រាស់យន្តហោះគ្មានមនុស្សបើកវាយប្រហារជាង ៣.០០០គ្រឿង លើទីក្រុង និងសហគមន៍នានារបស់អ៊ុយក្រែន។
ជាមួយគ្នានេះ អ៊ុយក្រែនកំពុងអំពាវនាវឱ្យសហភាពអឺរ៉ុបដាក់ចេញកញ្ចប់ទណ្ឌកម្មថ្មីលើរុស្ស៊ី ដើម្បីទប់ស្កាត់ការផលិតអាវុធ និងមីស៊ីលរបស់រុស្ស៊ី។ រហូតមកដល់ពេលនេះ រុស្ស៊ីមិនទាន់បានចេញមុខឆ្លើយតបចំពោះការលើកឡើងទាំងនេះនៅឡើយទេ៕
