កាលពីថ្ងៃទី៨ ខែវិច្ឆិកា ឆ្នាំ២០២៦ ប្រធានាធិបតីតួកគី លោក រ៉េសេប តាយយីប អឺដូហ្គែន បានប្រកាសបន្តគាំទ្រអាស៊ែបៃហ្សង់ ក្នុងការខិតខំបង្កើតសន្តិភាព និងស្ថិរភាពយូរអង្វែងនៅតំបន់កូកាសខាងត្បូង។ ការប្រកាសនេះធ្វើឡើងក្នុងជំនួបជាមួយប្រធានាធិបតីអាស៊ែបៃហ្សង់ លោក អ៊ីលហាំ អាលីយ៉េវ នៅទីក្រុងស៊ូសា ក្នុងឱកាសខួប៦ឆ្នាំនៃការរំដោះតំបន់កាហ្វខាស។
សារព័ត៌មានAnadolu Agency។
លោក អឺដូហ្គែន បានលើកឡើងថា ជ័យជម្នះរបស់អាស៊ែបៃហ្សង់ក្នុងសង្គ្រាមរយៈពេល៤៤ថ្ងៃ ជាមួយអាមេនី កាលពីឆ្នាំ២០២០ បានបើកទំព័រថ្មីសម្រាប់តំបន់នេះ។ លោកក៏បានសរសើរការខិតខំប្រឹងប្រែងរបស់អាស៊ែបៃហ្សង់ ក្នុងការសាងសង់ និងស្តារតំបន់កាហ្វខាសឡើងវិញ ព្រមទាំងសន្យាថា តួកគីនឹងបន្តជួយគាំទ្រផ្នែកសាងសង់ហេដ្ឋារចនាសម្ព័ន្ធ និងការអភិវឌ្ឍ។
ជាការឆ្លើយតប លោក អាលីយ៉េវ បានថ្លែងអំណរគុណចំពោះការគាំទ្ររបស់តួកគីក្នុងអំឡុងសង្គ្រាម និងបានបញ្ជាក់ថា ទំនាក់ទំនងរវាងប្រទេសទាំងពីរមានភាពរឹងមាំ និងមិនអាចបំបែកបានឡើយ។ លោកក៏បានចាត់ទុកកិច្ចសហប្រតិបត្តិការរវាងប្រទេសទាំងពីរថា ជាកត្តាសំខាន់សម្រាប់សន្តិសុខ ស្ថិរភាព និងកិច្ចសហប្រតិបត្តិការក្នុងតំបន់។
គួរបញ្ជាក់ថា តួកគី និងអាស៊ែបៃហ្សង់ មានទំនាក់ទំនងជិតស្និទ្ធលើវិស័យនយោបាយ សេដ្ឋកិច្ច និងយោធា ហើយបានពង្រឹងភាពជាសម្ព័ន្ធមិត្តតាមរយៈសេចក្តីប្រកាសទីក្រុងស៊ូសា ដែលបានចុះហត្ថលេខាកាលពីថ្ងៃទី១៥ ខែមិថុនា ឆ្នាំ២០២១៕
