គណៈប្រតិភូរុស្ស៊ីបានទៅដល់ទីក្រុងអាប៊ូដាប៊ីរបស់ប្រទេសអារ៉ាប់រួម ដើម្បីចូលរួមកិច្ចចរចាត្រីភាគីជាមួយអ៊ុយក្រែន និងសហរដ្ឋអាមេរិក ដែលគ្រោងចាប់ផ្តើមនៅថ្ងៃអង្គារ ទី១០ ខែវិច្ឆិកា ឆ្នាំ២០២៦។
សារព័ត៌មានAnadolu Agency។
គណៈប្រតិភូរុស្ស៊ីដឹកនាំដោយលោក វ្ល៉ាឌីមៀ មេឌីនស្គី ខណៈគណៈប្រតិភូអ៊ុយក្រែនដឹកនាំដោយលោក រូស្ទែម អ៊ូមេរ៉ូវ ប្រធានសេវាស៊ើបការណ៍សម្ងាត់បរទេស។ កិច្ចចរចានេះនឹងផ្តោតលើបញ្ហាសន្តិសុខ និងការធានាសន្តិសុខ ដោយមានសហរដ្ឋអាមេរិកជាអ្នកសម្របសម្រួល។
អ្នកនាំពាក្យវិមានក្រឹមឡាំងបានបញ្ជាក់ថា តំណាងអឺរ៉ុបនឹងមិនចូលរួមក្នុងកិច្ចចរចានេះទេ ព្រោះភាគីទាំងបីបានព្រមព្រៀងគ្នាថា នឹងរៀបចំកិច្ចប្រជុំក្នុងទម្រង់ត្រីភាគី។
គួរបញ្ជាក់ថា រុស្ស៊ី និងអ៊ុយក្រែនធ្លាប់បានចូលរួមកិច្ចចរចាសន្តិភាពដោយមានអាមេរិកជាអ្នកសម្របសម្រួលចំនួន៣លើក កាលពីដើមឆ្នាំ២០២៦ នៅទីក្រុងអាប៊ូដាប៊ី និងទីក្រុងហ្សឺណែវ។ កិច្ចចរចាជុំថ្មីនេះត្រូវបានរំពឹងថា នឹងជួយស្វែងរកដំណោះស្រាយចំពោះសង្គ្រាមរវាងប្រទេសទាំងពីរ៕
