មន្ត្រីសន្តិសុខជាន់ខ្ពស់អ៊ីរ៉ង់ លោក Mohsen Rezaei បានប្រកាសថា អ៊ីរ៉ង់នឹងមិនបើកច្រកសមុទ្រHormuz ឡើងវិញទេ រហូតដល់សហរដ្ឋអាមេរិកយល់ព្រមបំពេញលក្ខខណ្ឌទាំង៧ ដែលអ៊ីរ៉ង់បានដាក់សម្រាប់ការចរចាសន្តិភាព។
សារព័ត៌មានAl Jazeera នៅថ្ងៃទី១១ខែវិច្ឆិកា។
លោកបានបដិសេធព័ត៌មានដែលថា អ៊ីរ៉ង់កំពុងបន្តការចរចា ឬត្រៀមជួបពិភាក្សាជាមួយអាមេរិកនៅប្រទេសកាតា ដោយចាត់ទុកព័ត៌មាននេះថា មិនពិត។ លោកក៏បានអះអាងថា អាមេរិកកំពុងប្រើការលើកឡើងអំពីការចរចា ដើម្បីបន្ធូរបន្ថយសម្ពាធសេដ្ឋកិច្ច និងទប់ស្កាត់ការឡើងថ្លៃប្រេង។
លោកបន្តថា ចម្លើយដំបូងរបស់អាមេរិកចំពោះលក្ខខណ្ឌទាំង៧ របស់អ៊ីរ៉ង់ មិនទាន់គ្រប់គ្រាន់នោះទេ ហើយអ៊ីរ៉ង់កំពុងរង់ចាំចម្លើយច្បាស់លាស់បន្ថែមទៀត។
ការប្រកាសនេះធ្វើឡើង ខណៈប្រធានាធិបតីអាមេរិក លោក Donald Trump បានលើកឡើងថា មានសញ្ញាវិជ្ជមានឆ្ពោះទៅរកការបញ្ចប់សង្គ្រាម ហើយមិនចាំបាច់បើកការវាយប្រហារថ្មីលើអ៊ីរ៉ង់ទៀតទេ។ ទន្ទឹមនឹងនេះ កងឆ្មាំបដិវត្តន៍អ៊ីស្លាមអ៊ីរ៉ង់ (IRGC) បានរាយការណ៍ថា យ៉ាងហោចណាស់មាននាវាចំនួន៣គ្រឿងបានបុកមីន និងឆាបឆេះនៅក្នុងច្រកសមុទ្រ Hormuz។
ស្ថានការណ៍នេះបង្ហាញថា ភាពតានតឹងរវាងអ៊ីរ៉ង់ និងអាមេរិកនៅតែបន្ត ខណៈច្រកសមុទ្រ Hormuz ដែលជាផ្លូវដឹកជញ្ជូនប្រេងដ៏សំខាន់របស់ពិភពលោក នៅតែរងការបិទខ្ទប់៕
