រដ្ឋមន្ត្រីការបរទេសកូរ៉េខាងត្បូង និងអ៊ុយក្រែន បានជួបពិភាក្សាគ្នានៅទីក្រុងប៉ារីស ប្រទេសបារាំង កាលពីថ្ងៃអង្គារ ទី១០ ខែវិច្ឆិកា ឆ្នាំ២០២៦ ដើម្បីស្វែងរកវិធីស្តារទំនាក់ទំនងរវាងប្រទេសទាំងពីរឱ្យប្រក្រតីឡើងវិញ បន្ទាប់ពីមានភាពតានតឹងជុំវិញបញ្ហាអ្នកទោសសង្គ្រាមកូរ៉េខាងជើងចំនួន ២នាក់។
សារព័ត៌មានAnadolu Agency។
កិច្ចប្រជុំនេះធ្វើឡើងនៅក្រៅកិច្ចប្រជុំរដ្ឋមន្ត្រីការបរទេសនៃក្រុមប្រទេស G7 និងជាការជួបពិភាក្សាផ្ទាល់លើកដំបូង ចាប់តាំងពីមានជម្លោះកើតឡើង។
រដ្ឋមន្ត្រីការបរទេសកូរ៉េខាងត្បូង លោក Cho Hyun បានសង្កត់ធ្ងន់ថា ការគោរពគ្នាទៅវិញទៅមក ការកសាងទំនុកចិត្ត និងការអនុវត្តកិច្ចព្រមព្រៀងរវាងប្រទេសទាំងពីរ គឺជាមូលដ្ឋានសំខាន់សម្រាប់ការអភិវឌ្ឍទំនាក់ទំនង។ លោកក៏បានបញ្ជាក់ថា កូរ៉េខាងត្បូងនឹងបន្តផ្តល់ជំនួយមនុស្សធម៌ និងគាំទ្រការស្តារប្រទេសអ៊ុយក្រែនឡើងវិញ។
ចំណែករដ្ឋមន្ត្រីការបរទេសអ៊ុយក្រែន លោក Andrii Sybiha បានអំពាវនាវឱ្យប្រទេសទាំងពីរសហការផ្នែកការទូត ដើម្បីរក្សាស្ថិរភាព និងពង្រឹងទំនាក់ទំនងឱ្យកាន់តែប្រសើរ។
ភាពតានតឹងបានកើតឡើង បន្ទាប់ពីប្រធានាធិបតីអ៊ុយក្រែន លោក Volodymyr Zelenskyy បានបង្ហើបក្នុងសុន្ទរកថានៅអង្គការសហប្រជាជាតិកាលពីខែកញ្ញា អំពីការបញ្ជូនអ្នកទោសសង្គ្រាមកូរ៉េខាងជើង ២នាក់ទៅកាន់ប្រទេសកូរ៉េខាងត្បូង។ បញ្ហានេះបានធ្វើឱ្យកូរ៉េខាងត្បូងហៅឯកអគ្គរដ្ឋទូតរបស់ខ្លួនត្រឡប់មកវិញ និងកាត់បន្ថយបុគ្គលិកស្ថានទូតនៅអ៊ុយក្រែនប្រហែលពាក់កណ្តាលកាលពីខែមុន៕
