សមាជិកព្រឹទ្ធសភាអាមេរិកចំនួន១២រូប កាលពីថ្ងៃអង្គារ ទី១០ ខែវិច្ឆិកា ឆ្នាំ២០២៦ បានជំរុញឱ្យមេដឹកនាំសភាដកចេញបទប្បញ្ញត្តិចំនួន៣ចំណុច ពីសេចក្តីព្រាងច្បាប់ស្តីពីការអនុញ្ញាតការពារជាតិឆ្នាំ២០២៧ ដែលមានគោលបំណងពង្រីកកិច្ចសហប្រតិបត្តិការបច្ចេកវិទ្យាយោធា និងការចែករំលែកព័ត៌មានសម្ងាត់ជាមួយអ៊ីស្រាអែល។
សារព័ត៌មានAnadolu Agency។
ក្នុងចំណោមសមាជិកព្រឹទ្ធសភាទាំងនោះ មានលោក Chris Van Hollen លោក Bernie Sanders និងលោកស្រី Elizabeth Warren។ ពួកគេបានលើកឡើងថា បទប្បញ្ញត្តិទាំងនេះអាចកាត់បន្ថយសិទ្ធិអំណាចរបស់រដ្ឋាភិបាលអាមេរិក ក្នុងការសម្រេចចិត្តដោយឯករាជ្យលើបញ្ហាសន្តិសុខជាតិ និងធ្វើឱ្យអាមេរិកជាប់ពាក់ព័ន្ធនឹងកិច្ចសន្យាយោធាជាមួយអ៊ីស្រាអែលរយៈពេលវែង។
បទប្បញ្ញត្តិដែលពួកគេចង់ដកចេញ ផ្តោតលើការផលិតអាវុធរួម ការផ្ទេរបច្ចេកវិទ្យា និងការស្រាវជ្រាវរួមក្នុងវិស័យបញ្ញាសិប្បនិម្មិត សង្គ្រាមតាមប្រព័ន្ធអ៊ីនធឺណិត និងបច្ចេកវិទ្យាយោធាទំនើបផ្សេងៗទៀត។
សមាជិកព្រឹទ្ធសភាទាំងនេះបានព្រមានថា កិច្ចសហប្រតិបត្តិការយ៉ាងជិតស្និទ្ធអាចផ្តល់ឥទ្ធិពលកាន់តែខ្លាំងដល់អ៊ីស្រាអែលលើសមត្ថភាពយោធារបស់អាមេរិក។ ពួកគេបានលើកឧទាហរណ៍ថា លក្ខខណ្ឌនៃការផលិតរួមប្រព័ន្ធការពារមីស៊ីល Iron Dome របស់អ៊ីស្រាអែល ធ្លាប់ជាឧបសគ្គដល់ការផ្ទេរប្រព័ន្ធការពារនេះពីអាមេរិកទៅឱ្យអ៊ុយក្រែន។
លើសពីនេះ ពួកគេក៏បានទាមទារឱ្យដកចេញបទប្បញ្ញត្តិដែលបង្ខំឱ្យអាមេរិកបង្កើនការចែករំលែកព័ត៌មានសម្ងាត់ជាមួយអ៊ីស្រាអែល និងមិនអនុញ្ញាតឱ្យរដ្ឋាភិបាលអាមេរិកផ្អាក ឬកាត់បន្ថយកិច្ចសហប្រតិបត្តិការនេះ។
សមាជិកព្រឹទ្ធសភាទាំង ១២រូបបានសង្កត់ធ្ងន់ថា រដ្ឋាភិបាលអាមេរិកគួរតែរក្សាសិទ្ធិក្នុងការកែសម្រួលកិច្ចសហប្រតិបត្តិការផ្នែកព័ត៌មានសម្ងាត់ ដោយផ្អែកលើផលប្រយោជន៍ និងសន្តិសុខជាតិរបស់ខ្លួន៕
