យោងតាមសមាគមបាល់ទាត់ប៉ាឡេស្ទីន អ្នកចាំទីបាល់ទាត់ជនជាតិប៉ាឡេស្ទីនម្នាក់ ឈ្មោះ ម៉ាហ្មូដ កាម៉ាល់ ហ្វារ៉េស អាប់ឌែលម៉ាឡេក អាយុ ២០ឆ្នាំ ត្រូវបានសម្លាប់ក្នុងការវាយប្រហារតាមអាកាសរបស់អ៊ីស្រាអែល កាលពីថ្ងៃអង្គារ នៅតំបន់សាបរ៉ា ភាគខាងត្បូងទីក្រុងហ្គាហ្សា។
សារព័ត៌មានAnadolu Agency នៅថ្ងៃទី១២ខែវិច្ឆិកា។
ជនរងគ្រោះជាប្រធានក្រុម និងជាអ្នកចាំទីរបស់ក្លិបបាល់ទាត់ Gaza Sports Club។ ការស្លាប់របស់លោកបានកើនចំនួនអត្តពលិក និងបុគ្គលិកកីឡាប៉ាឡេស្ទីនដែលស្លាប់ ចាប់តាំងពីខែតុលា ឆ្នាំ២០២៣ ដល់ ១.០១៧នាក់។
គួរបញ្ជាក់ថា មុនពេលស្លាប់ត្រឹមតែ៥ថ្ងៃ លោកបានចូលរួមប្រកួតវគ្គផ្តាច់ព្រ័ត្រនៃពានរង្វាន់ Thousand Martyrs Cup ដែលរៀបចំឡើងដើម្បីគោរពដល់អត្តពលិក និងមន្ត្រីកីឡាដែលបានបាត់បង់ជីវិត។ ការប្រកួតនេះក៏ជាការវិលត្រឡប់មករៀបចំការប្រកួតបាល់ទាត់ជាថ្មី បន្ទាប់ពីសកម្មភាពកីឡាត្រូវបានផ្អាកដោយសារសង្គ្រាម និងការបំផ្លាញទីលានកីឡា។
សមាគមបាល់ទាត់ប៉ាឡេស្ទីនក៏បានរាយការណ៍ពីការស្លាប់កីឡាករបាល់ទាត់វ័យ១៥ឆ្នាំម្នាក់ទៀត ឈ្មោះ ម៉ូហាម៉េដ នីដាល់ បារបាក់ ដែលត្រូវបានកងកម្លាំងអ៊ីស្រាអែលបាញ់សម្លាប់ ខណៈកំពុងលេងបាល់ទាត់ជាមួយមិត្តភក្តិនៅតំបន់អាល់ម៉ាវ៉ាស៊ី ភាគខាងត្បូងហ្គាហ្សា។
គិតចាប់តាំងពីខែតុលា ឆ្នាំ២០២៣ សង្គ្រាមនៅហ្គាហ្សាបានបណ្តាលឱ្យប្រជាជនប៉ាឡេស្ទីនស្លាប់ជាង ៧៤.៦០០នាក់ និងរងរបួសជិត ១៧៦.០០០នាក់ ខណៈហេដ្ឋារចនាសម្ព័ន្ធប្រមាណ ៩០% នៅក្នុងតំបន់នេះត្រូវបានបំផ្លាញ៕
