ប្រភពវេជ្ជសាស្ត្របានឱ្យដឹងថា ការវាយប្រហាររបស់អ៊ីស្រាអែលនៅតំបន់ហ្គាហ្សា កាលពីថ្ងៃព្រហស្បតិ៍ ទី១២ ខែវិច្ឆិកា បានសម្លាប់ជនជាតិប៉ាឡេស្ទីនចំនួន៧នាក់ និងធ្វើឱ្យមនុស្សជាង២០នាក់រងរបួស ដែលជាការរំលោភលើកិច្ចព្រមព្រៀងបទឈប់បាញ់។
សារព័ត៌មានAnadolu Agency។
ក្នុងចំណោមអ្នកស្លាប់ទាំងនោះ មាន ៦នាក់បានស្លាប់ដោយសារការវាយប្រហារតាមអាកាសលើអគារ Al-Yasin ក្នុងមន្ទីរពេទ្យ Nasser នៅទីក្រុង Khan Younis។ ជនរងគ្រោះរួមមានបុគ្គលិកពេទ្យ អ្នកជំងឺ និងអ្នកមកមើលថែអ្នកជំងឺ។ ការវាយប្រហារនេះក៏បានបង្កការខូចខាតយ៉ាងធ្ងន់ធ្ងរដល់ផ្នែកសង្គ្រោះបន្ទាន់ និងផ្នែកវះកាត់របស់មន្ទីរពេទ្យផងដែរ។
ដោយឡែក បុរសជនជាតិប៉ាឡេស្ទីនម្នាក់ទៀតឈ្មោះ ហាសាន់ អាប៊ូ ខ្រៃស ត្រូវបានបាញ់សម្លាប់ដោយកងកម្លាំងអ៊ីស្រាអែល នៅភាគខាងកើតជំរំជនភៀសខ្លួន Bureij។ ចំណែកស្ត្រីជនជាតិប៉ាឡេស្ទីនអាយុ ២៣ឆ្នាំម្នាក់ ក៏បានរងរបួសធ្ងន់ដោយសារការបាញ់ប្រហារលើតង់ជនភៀសខ្លួននៅតំបន់ Al-Mawasi ខណៈកំពុងដេកក្នុងតង់របស់ខ្លួន។
ក្រសួងសុខាភិបាលហ្គាហ្សាបានថ្កោលទោសការវាយប្រហារលើមន្ទីរពេទ្យ ដោយចាត់ទុកថាជាការរំលោភយ៉ាងធ្ងន់ធ្ងរលើច្បាប់អន្តរជាតិ ដែលធានាការការពារដល់មន្ទីរពេទ្យ និងបុគ្គលិកសុខាភិបាល។
គួរបញ្ជាក់ថា ចាប់តាំងពីបទឈប់បាញ់ចូលជាធរមាននៅថ្ងៃទី១០ ខែតុលា ឆ្នាំ២០២៥ ការរំលោភបទឈប់បាញ់របស់អ៊ីស្រាអែលបានបណ្តាលឱ្យជនជាតិប៉ាឡេស្ទីនស្លាប់ ១.៦២២នាក់ និងរងរបួស ៥.៨៧៨នាក់។ ចំណែកសង្គ្រាមដែលចាប់ផ្តើមក្នុងខែតុលា ឆ្នាំ២០២៣ បានបណ្តាលឱ្យមនុស្សស្លាប់ជាង ៧៤.៦០០នាក់ និងរងរបួសជិត ១៧៦.០០០នាក់៕
