ការជួបពិភាក្សាអំពីបញ្ហាសន្តិសុខ រវាងលោក Gadi Eisenkot (អ្នកដែលត្រូវបានចាត់តាំងឱ្យបង្កើតរដ្ឋាភិបាលអ៊ីស្រាអែល) ជាមួយនាយករដ្ឋមន្ត្រីស្តីទី លោក Benjamin Netanyahu និងលេខាធិការផ្នែកយោធា របស់លោក បានបញ្ចប់ កាលពីថ្ងៃព្រហស្បតិ៍ទី១២.១១.២០២៦ បន្ទាប់ពីដំណើរការអស់រយៈពេល ២ម៉ោង។
សារព័ត៌មានAnadolu។
ជំនួបនេះធ្វើឡើង ចំពេលដែលមានសេចក្តីរាយការណ៍ អំពីលទ្ធភាពនៃការចាប់ផ្តើមសកម្មភាពយោធា ឡើងវិញប្រឆាំងនឹងអ៊ីរ៉ង់ ជំនួបដែលធ្វើឡើងនៅការិយាល័យរបស់លោក Netanyahu ក្នុងទីក្រុង Jerusalemនេះ បានបញ្ចប់បន្ទាប់ពីរយៈពេល ២ម៉ោង។
សេចក្តីថ្លែងការណ៍បញ្ជាក់ថា៖ «លោក Eisenkot ទទួលបានការសង្ខេបអំពីបញ្ហាប្រឈមផ្នែកសន្តិសុខ និងការទូត ដែលរដ្ឋអ៊ីស្រាអែល កំពុងជួបប្រទះនៅពេលនេះ»ភាគីទាំងពីរបានព្រមព្រៀងគ្នាបន្តផ្លាស់ប្តូរព័ត៌មានថ្មីៗតាមការចាំបាច់។
ជំនួបនេះត្រូវបានរៀបចំឡើង បន្ទាប់ពីលោក Eisenkot បានស្នើសុំឱ្យអគ្គរដ្ឋអាជ្ញា លោកស្រី Gali Baharav-Miara ជួយអន្តរាគមន៍ ដើម្បីធានាថា គាត់ទទួលបានការសង្ខេបអំពីបញ្ហាសន្តិសុខជាប្រចាំ ដោយសារតំណែងជាមេដឹកនាំបក្សប្រឆាំងនៅទំនេរនៅឡើយ ក្រោយពីសភា Knesset ថ្មីបានចាប់ផ្តើមដំណើរការ។
ជំនួបនេះក៏បានកើតឡើងមួយថ្ងៃ បន្ទាប់ពីលោក Eisenkot បានព្រមានលោក Netanyahu កុំឱ្យចាត់វិធានការយោធា ឬប្រតិបត្តិការសន្តិសុខណាមួយ ប្រសិនបើមិនមានការគំរាមកំហែងភ្លាមៗនោះទេ ក្នុងអំឡុងពេលនៃការផ្លាស់ប្តូររដ្ឋាភិបាល។
នៅក្នុងលិខិតមួយកាលពីថ្ងៃពុធ លោក Eisenkot បានលើកឡើងថា លោក Netanyahu មិនទទួលបានទំនុកចិត្តពីសភាទៀតនោះទេ។
ដោយមានសមាជិកសភាត្រឹមតែ៤៦ រូបប៉ុណ្ណោះដែលគាំទ្រឱ្យលោកបន្តកាន់តំណែង។
លោក Netanyahu បានច្រានចោលការព្រមាននេះ ដោយចាត់ទុកថា ជាទង្វើ«គ្មានការទទួលខុសត្រូវ» ហើយបានជំរុញឱ្យលោក Eisenkot កុំបង្កឱ្យមានការភ័យខ្លាច និងការបែកបាក់។
ទន្ទឹមនឹងនេះ យោងតាមគេហទំព័រ Ynet មន្ត្រីជាន់ខ្ពស់នៅក្នុងបក្សប្រឆាំងបានចោទប្រកាន់លោក Netanyahu ថា បានព្យាយាមជំរុញឱ្យមានសកម្មភាពយោធាឯកតោភាគីប្រឆាំងនឹងអ៊ីរ៉ង់ ដោយគ្មានការគាំទ្រពីសហរដ្ឋអាមេរិក ទោះបីជាមានការជំទាស់ពីមេបញ្ជាការយោធា ឧត្តមសេនីយ៍ឯក Eyal Zamir និងមន្ត្រីសន្តិសុខជាន់ខ្ពស់ផ្សេងទៀតក៏ដោយ។
មន្ត្រីបក្សប្រឆាំងម្នាក់ បានចោទប្រកាន់លោក Netanyahu ថាព្យាយាមអូសទាញអ៊ីស្រាអែលឱ្យធ្លាក់ចូលក្នុងសង្គ្រាម ដើម្បីរារាំងកិច្ចខិតខំប្រឹងប្រែងរបស់លោក Eisenkot ក្នុងការបង្កើតរដ្ឋាភិបាល។
របាយការណ៍បានឱ្យដឹងថា គណៈរដ្ឋមន្ត្រីសន្តិសុខរបស់អ៊ីស្រាអែល ដែលគ្រោងនឹងជួបប្រជុំគ្នានៅថ្ងៃអាទិត្យ បានណែនាំឱ្យយោធា បង្កើនការត្រៀមខ្លួនសម្រាប់សេណារីយ៉ូផ្សេងៗ។
ដែលពាក់ព័ន្ធនឹងអ៊ីរ៉ង់ រួមទាំងលទ្ធភាពនៃការវ លោក Avigdor Lieberman មេដឹកនាំគណបក្ស Yisrael Beiteinu ក៏បានព្រមានកាលពីថ្ងៃព្រហស្បតិ៍ដែរថា រដ្ឋាភិបាលបណ្តោះអាសន្ន មិនគួរធ្វើការសម្រេចចិត្តណាមួយដែលអាចនាំឱ្យមានសង្គ្រាមឡើយ ប្រសិនបើគ្មានការត្រួតពិនិត្យពីសភា និងការឯកភាពពីមន្ត្រីសន្តិសុខជាន់ខ្ពស់។
កាលពីថ្ងៃអាទិត្យ ប្រធានាធិបតីអ៊ីស្រាអែល លោក Isaac Herzog បានប្រគល់ភារកិច្ចជូនលោក Eisenkot មេដឹកនាំគណបក្ស Yashar ឱ្យបង្កើតរដ្ឋាភិបាល។
បន្ទាប់ពីក្រុមនានា នៅក្នុងសភាដែលតំណាងឱ្យសមាជិកសភាចំនួន៦៧ រូប បានស្នើឈ្មោះលោក។
ខណៈដែលលោក Netanyahu ទទួលបានការគាំទ្រពីសមាជិកសភាចំនួន ៤៦រូប។
លោក Eisenkot មានរយៈពេល២៨ ថ្ងៃក្នុងការបង្កើតរដ្ឋាភិបាលចម្រុះ ហើយអាចនឹងមានការបន្តរយៈពេលបន្ថែមចំនួន ១៤ថ្ងៃទៀត។
ការប្រគល់ភារកិច្ចនេះ ធ្វើឡើងបន្ទាប់ពីការបោះឆ្នោតសភា កាលពីថ្ងៃទី២៧ ខែតុលា ។
ដែលលទ្ធផលបានបង្ហាញថា ទាំងប្លុករបស់លោក Netanyahu និងក្រុមប្រឆាំង សុទ្ធតែមិនទទួលបានសំឡេងភាគច្រើនដាច់ខាត នៅក្នុងសភា (Knesset) ដែលមានអាសនៈសរុបចំនួន ១២០នោះទេ។
លោក Netanyahu នៅតែបន្តកាន់តំណែងជានាយករដ្ឋមន្ត្រីបណ្តោះអាសន្ន រហូតទាល់តែមានរដ្ឋាភិបាលថ្មីចូលកាន់តំណែង៕
