ប្រទេសអ៊ីរ៉ង់ បានចោទប្រកាន់សហរដ្ឋអាមេរិកថា បានធ្វើសង្គ្រាមឈ្លានពានដោយខុសច្បាប់ប្រឆាំងនឹងអ៊ីរ៉ង់ និងបានព្រមានថា ខ្លួននឹងឆ្លើយតបភ្លាមៗ និងយ៉ាងម៉ឺងម៉ាត់ ប្រសិនបើអាមេរិក ឬអ៊ីស្រាអែលបើកការវាយប្រហារយោធាឡើងវិញ។
សារព័ត៌មានAnadolu Agency។
ការព្រមាននេះធ្វើឡើងដោយលោក ហ្គោឡាមហូសេន ដាហ្ស៊ី តំណាងអចិន្ត្រៃយ៍រងរបស់អ៊ីរ៉ង់ប្រចាំអង្គការសហប្រជាជាតិ ក្នុងកិច្ចប្រជុំក្រុមប្រឹក្សាសន្តិសុខស្តីពីស្ថានការណ៍នៅមជ្ឈិមបូព៌ា កាលពីថ្ងៃទី១៤ ខែវិច្ឆិកា ឆ្នាំ២០២៦។
លោកដាហ្ស៊ីបានរិះគន់ប្រទេសលោកខាងលិចថា កំពុងបំភ្លៃការពិត និងប្រើប្រាស់ស្តង់ដារពីរចំពោះជម្លោះក្នុងតំបន់។ លោកបានលើកឡើងថា សហរដ្ឋអាមេរិកគឺជាអ្នកឈ្លានពាន មិនមែនជាជនរងគ្រោះនោះទេ ហើយបានចោទវ៉ាស៊ីនតោនថា បានរំលោភធម្មនុញ្ញអង្គការសហប្រជាជាតិ និងច្បាប់អន្តរជាតិ តាមរយៈការវាយប្រហារលើអ៊ីរ៉ង់។
តំណាងអ៊ីរ៉ង់រូបនេះក៏បានចោទអាមេរិកថា បានរំលោភអធិបតេយ្យភាព និងបូរណភាពទឹកដីអ៊ីរ៉ង់ វាយប្រហារហេដ្ឋារចនាសម្ព័ន្ធស៊ីវិល និងដាក់ការបិទខ្ទប់ផ្នែកយោធា និងដែនសមុទ្រផងដែរ។ លោកបានបញ្ជាក់ថា អ៊ីរ៉ង់មានសិទ្ធិការពារខ្លួន ប្រសិនបើរងការវាយប្រហារដោយអាវុធ។
ទោះបីជាមានភាពតានតឹងក៏ដោយ លោកដាហ្ស៊ីបានអះអាងថា អ៊ីរ៉ង់មិនដែលបិទទ្វារចំពោះការទូតឡើយ និងនៅតែមានឆន្ទៈស្វែងរកដំណោះស្រាយតាមរយៈការចរចា។
យ៉ាងណាក៏ដោយ លោកបានព្រមានយ៉ាងច្បាស់ថា ប្រសិនបើអាមេរិក ឬអ៊ីស្រាអែលបន្តបើកសង្គ្រាមប្រឆាំងនឹងអ៊ីរ៉ង់ទៀត ទីក្រុងតេអេរ៉ង់នឹងឆ្លើយតបភ្លាមៗ និងដោយមិនស្ទាក់ស្ទើរ ទៅលើប្រភពនៃការឈ្លានពានគ្រប់ទីកន្លែងដែលមាន៕
