កងឆ្មាំបដិវត្តន៍អ៊ីស្លាមអ៊ីរ៉ង់ (IRGC) អះអាងកាលពីថ្ងៃអាទិត្យ ទី១៥ ខែវិច្ឆិកា ឆ្នាំ២០២៦ ថាខ្លួនបានប្រើប្រាស់ដ្រូនចំនួន៦គ្រឿង វាយប្រហារលើទីតាំងរ៉ាដាការពាររបស់សហរដ្ឋអាមេរិក នៅមូលដ្ឋានទ័ពអាកាសអាល់រីហ្វា ក្នុងប្រទេសបារ៉ែន។ ទោះជាយ៉ាងណា មិនទាន់មានព័ត៌មានបញ្ជាក់ថា ការវាយប្រហារនេះបានបង្កការខូចខាតអ្វីខ្លះនោះទេ។
សារព័ត៌មានAnadolu Agency។
ការអះអាងនេះកើតឡើងបន្ទាប់ពីក្រសួងមហាផ្ទៃបារ៉ែនបានចេញការព្រមានអំពីការគំរាមកំហែងដែលអាចកើតមាន និងបានណែនាំប្រជាពលរដ្ឋឱ្យស្វែងរកទីជម្រកសុវត្ថិភាព។
ជាមួយគ្នានេះ អ៊ីរ៉ង់បានប្រកាសថា ច្រកសមុទ្រហ័រមូសនៅតែបិទ និងព្រមានថា ប្រសិនបើសហរដ្ឋអាមេរិកបើកការវាយប្រហារណាមួយ អ៊ីរ៉ង់នឹងឆ្លើយតបកាន់តែខ្លាំងក្លា និងធ្ងន់ធ្ងរជាងមុន។
ភាពតានតឹងរវាងអ៊ីរ៉ង់ និងសហរដ្ឋអាមេរិកនៅតែបន្តកើតមាន ជុំវិញបញ្ហាសេរីភាពនៃការធ្វើនាវាចរណ៍នៅច្រកសមុទ្រហ័រមូស ដែលជាផ្លូវដឹកជញ្ជូនថាមពល និងទំនិញដ៏សំខាន់របស់ពិភពលោក។ ជម្លោះនេះបានចាប់ផ្តើមពីការវាយប្រហាររបស់អាមេរិក និងអ៊ីស្រាអែលលើអ៊ីរ៉ង់ កាលពីថ្ងៃទី២៨ ខែកុម្ភៈ ហើយទោះបីភាគីទាំងពីរបានព្រមព្រៀងបទឈប់បាញ់ក្នុងខែមេសាក៏ដោយ ការប្រឈមមុខដាក់គ្នាបានកើតឡើងជាថ្មី បន្ទាប់ពីការចរចាមិនទទួលបានលទ្ធផល៕
