កងកម្លាំងរដ្ឋាភិបាលយេម៉ែនបានឱ្យដឹងកាលពីថ្ងៃទី១៥ ខែវិច្ឆិកា ឆ្នាំ២០២៦ ថាមេបញ្ជាការយោធាជាន់ខ្ពស់ម្នាក់ និងកងកម្លាំងមួយចំនួនទៀតបានស្លាប់ ក្នុងការប៉ះទង្គិចគ្នាជាមួយក្រុមឧទ្ទាមហ៊ូទី នៅខេត្តអាល់ចូវ ភាគខាងជើងប្រទេស។
សារព័ត៌មានAnadolu Agency។
ជាមួយគ្នានេះ ទីភ្នាក់ងារសារព័ត៌មានរដ្ឋ Saba បានរាយការណ៍ថា ជនស៊ីវិលចំនួន ៦ នាក់ ក្នុងនោះមានកុមារ ២ នាក់ និងស្ត្រី ២ នាក់ បានរងរបួសដោយសារការបាញ់ផ្លោង និងការបាញ់ប្រហារពីអ្នកលបបាញ់របស់ក្រុមហ៊ូទី នៅខេត្តតៃស។ ក្រៅពីនេះ កុមារ ២ នាក់ និងស្ត្រីម្នាក់ក៏បានរងរបួសផងដែរ ដោយសារគ្រាប់មីនដែលក្រុមហ៊ូទីដាក់នៅតាមផ្លូវបានផ្ទុះក្រោមរថយន្តដឹកជនស៊ីវិល។
កងទ័ពយេម៉ែនក៏បានអះអាងថា ខ្លួនបានស្ទាក់ចាប់ដ្រូនរបស់ក្រុមហ៊ូទី ដែលមានគោលដៅវាយប្រហារទីក្រុងម៉ារីប។ ចំណែកទូរទស្សន៍ Al-Masirah របស់ក្រុមហ៊ូទីបានរាយការណ៍ពីការវាយប្រហារតាមអាកាសនៅរដ្ឋធានីសាណា ដោយចោទប្រកាន់ថា អារ៉ាប៊ីសាអូឌីតជាអ្នកនៅពីក្រោយការវាយប្រហារនេះ។ ក្រុមហ៊ូទីក៏បានអះអាងថា ខ្លួនបានបាញ់ទម្លាក់ដ្រូនយោធារបស់អារ៉ាប៊ីសាអូឌីតមួយគ្រឿងផងដែរ ប៉ុន្តែមិនទាន់មានការបញ្ជាក់ពីភាគីអារ៉ាប៊ីសាអូឌីតនៅឡើយទេ។
គួរបញ្ជាក់ថា ប្រទេសយេម៉ែនបានធ្លាក់ក្នុងសង្គ្រាមស៊ីវិលតាំងពីឆ្នាំ២០១៤ បន្ទាប់ពីក្រុមហ៊ូទីដែលមានអ៊ីរ៉ង់គាំទ្រ បានកាន់កាប់រដ្ឋធានីសាណា និងខេត្តមួយចំនួន។ នៅឆ្នាំ២០១៥ ក្រុមចម្រុះដឹកនាំដោយអារ៉ាប៊ីសាអូឌីតបានចូលធ្វើអន្តរាគមន៍ ដើម្បីគាំទ្ររដ្ឋាភិបាលយេម៉ែនដែលទទួលស្គាល់ជាអន្តរជាតិ៕
